Йов 41 - Хальмг келнд орчулсн Әрүн Бичлһс

¹ Күүнә тиим нәәлвр хоосн дими! Һанцхн терүнә бәәдләс унх.

² Кен терүг наад бәрҗ чадхмб? Кен терүнә өмн нүүрцҗ зогсхмб?

³ «Мини хаалһд харшлснд, Би хәрүһинь өгхв. Теңгр дор бәәх цуг юмс – мини!»

⁴ Терүнә махмудын әңгин тускар, Терүнә күчнә болн кевтә бәәдлин тускар тагчг бәәшгов.

⁵ Кен терүнә арсинь шуулхмб, Терүнә хойр дам халхцинь цумлхмб?

⁶ Кен терүнә өргинь секхмб? Терүнә шүднәс әәмшг һарчана!

⁷ Терүнә нурһнд – халхцин зерглән, Тернь заг угаһар тамһар мет залһата;

⁸ Негнегнләһән тедн ниилүлгдҗ, Теднә хоорндаһар ки чигн оршго;

⁹ Негнегндән шахлдата, Тасрлт угаһар келкәтә.

¹⁰ Кемр тер нәәтххлә – һал цәклнә, Терүнә нүдн – һарчах нарн мет;

¹¹ Амнаснь һал һарна, Һалын очн тарна;

¹² Һал деер буслҗах хәәснәс мет Терүнә хамрас утан һарна;

¹³ Терүнә әмсхл цог шатана, Амнаснь шатҗах һалын заль падрна!

¹⁴ Терүнә күзүнд чидл бәәнә, Терүнә өмн әәмшг гүүҗәнә.

¹⁵ Махта әңгнь дегд батар ниилүлгдҗ, Төрүц көндршго юмн.

¹⁶ Терүнә зүркн чолун мет хату, Дор бәәх теермдг чолунла әдл.

¹⁷ Терүг босч ирхлә, күчтә юмсуд әәцхәнә, Терүнә дәврлһнәс үүмцхәнә.

¹⁸ Терүнлә зөрлцхлә, үлд чигн, Җид чигн, сумн чигн, талдан зерзев чигн тусшго;

¹⁹ Төмриг тер хатсн өвсн гиҗ тоолна, Күрл төмриг – үмкә моднд.

²⁰ Саадгин сумн чигн терүг зулҗ гүүлгүлшго, Праща кегдләс хайсн чолун терүнд өвснә хатсн үлдллә әдл;

²¹ Бүдүн модыг тер нимгн өвснд тоолх, Җидин ә терүнд инәдтә.

²² Терүнә гесн – чолуна хурц хамхрха әңг мет, Терүгәрн бальчг керчнә.

²³ Усна урсхулыг, хәәснлә әдләр буслһна, Теңгсиг чолун савд буслҗах ноһан мет кенә;

²⁴ Бийиннь ард гилвкҗәх мөр үлдәнә, Йорал уга усн цәәҗ одсн болна.

²⁵ Терүнлә әдлнь һазр деер уга – Әәмшг меддгоһар үүдәгдҗ.

²⁶ Тер цугтаһинь деерлкҗ хәләнә, Тер цуг зерлг аңгин хан.