Йов 39 - Хальмг келнд орчулсн Әрүн Бичлһс

¹ Уулын хад деер ямад ишклх болзгинь меддвч? Буһ марл ишклҗәхиг хәләлч?

² Тедниг кедү сардан саата бәәхинь тоолҗ чадхвч? Кезә тедн хурһдан һарһхиг меддвч?

³ Кезә суух, төрх болн геснәс һазаран һарх?

⁴ Теднә хурһд теңгр дор сулдан өсәд батрад, Теднәс дәкәд салад йовна, тедн тал хәрү ирцхәхш.

⁵ Зерлг элҗгниг кен сулднь тәвв? Терүнә чөдринь кен сулдхв?

⁶ Би терүг көдә теегт орулв, Давста һазрар бәәринь кевүв.

⁷ Балһсна шуугата бәәдлиг тер наад бәрнә, Мал тууһачин ду элҗгн соңсад уга.

⁸ Довуд эргәд тер малын идг хәәнә, Өвсн болһниг түүнә.

⁹ Зерлг бух чамд церглхәр седхий, Хотта чини тевшин хаҗуд хонхий?

¹⁰ Тиим царар һазр хаһлулхийч? Чамд тер һазриг тегшлҗ өгхий?

¹¹ Терүнә күчтә чидлд иткхийч? Терүнд эврәннь күнд көдлмшән даалһхвч?

¹² Чини буудяг тер хәрү өгх гиҗәнч? Амбарт терүг хурах гиҗ нәәлхвч?

¹³ Страус шовун далваган байрлҗ саҗна, Болв тернь аист шовуна өрвлглә болн булла әдлцшго.

¹⁴ Эм шовун һазр деер өндгән элснд халтха гиһәд үлдәнә.

¹⁵ Кен чигн терүг ишкх гиҗ әәҗәхш, Зерлг аңгуд терүг хамхлх гиҗ әәҗәхш.

¹⁶ Терүнә һууҗмулмуд бийиннь биш кевтә экнь теднләһән догшн. Болв терүнә көдлмш киидән давхас тер әәҗәхш,

¹⁷ Яһад гихлә Бурхн терүнд цецн уха өгсн уга, Терүнд серл орулсн уга.

¹⁸ Болв босад гүүхләрн тер – Мөртә күүг зог кеһәд давх!

¹⁹ Чи мөрнднь чидл өгсн болвзач? Терүнә күзүнд дел өмсквчи?

²⁰ Царцаха мет һәрәддг дасхвчи? Терүнә күчтә сүрклһн әәмшгтә!

²¹ Тер байртаһар туруһарн һазр цокна, Бәәсн чидләрн дәәлдәнд орхар седнә.

²² Әәмшгәс әәлго тер инәнә, Нам селмәс әәҗ зогсшго.

²³ Терүн деер саадгин сумна герин ә һарна, Саадг болн җид гилвкнә.

²⁴ Тер чичрәд, бизһтәһәр хурдлҗ гүүнә. Бүшкүрин ә соңсн тер ормдан зогсхш.

²⁵ Бүшкүр дуулхла, тер байрлҗ хәәкрнә, Дәәлдәг тер холас тааҗ меднә, Нойдын хәәкрлһ болн дәәчнрин дуудвр меднә.

²⁶ Җиврән өмн үзг тал деләд, Чини седвәрәр начн шовун нисҗәнү?

²⁷ Чини келсәр һәрд шовун деегшлҗ нисәд, Уулын орад эврәннь үүрән ясну?

²⁸ Тер уулын хадд бәәнә, Күн күршго хурц үзүртнь хонна.

²⁹ Тендәс бийдән теҗәл хәәҗ гетнә. Терүнә нүдн холд үзнә!

³⁰ Һууҗмулмуднь цус ууна, үксн күш бәәсн ормиг тер эргнә.

³¹ Деед Эзн Йовд бас иигҗ келнә:

³² – Эн зүткәч Хамгин Күчтәлә сөрлцҗәхмб? Бурхиг керлдҗәх күн хәрү өгтхә!

Деед Эзнд өгчәх Йовин хәрү

³³ Деед Эзнд Йов хәрү өгнә:

³⁴ – Би һәәлгдсн күмб! Танд юн гиҗ келхв? Эврәннь һарарн аман хааҗанав.

³⁵ Би нег дәкҗ келләв, болв нанд хәрү уга, Хойрдад келв – дәкҗ келшгов.