Йов 38 - Хальмг келнд орчулсн Әрүн Бичлһс

Йовд келҗәх Деед Эзнә үг

¹ Тиигхлә догшн салькнас Деед Эзн Йовд хәрү өгнә:

² – Учрутх уга үгмүд келдгәрн чи кен болҗахмбч, Мини седвәрт иткҗәхшвч?

³ Залу күүнлә әдл хувцан бүслҗ ав! Би сурсув, чи Нанд хәрүһинь өг:

⁴ Намаг һазр тогтаҗах цагт чи альд йовлач? Кемр меддг болн тоолврта болхлаг кел.

⁵ Терүнә кемҗәһинь кен кесинь меддг болхла Болн кен терүн деер кемҗәлх деес татсинь кел?

^6-7 Терүнә ул юн деер зогсҗана? Өрүни одд гилвдалв гиһәд мандлҗасн цагт, Бурхна цуг теңгрин элчнрин байрта хәәкрлһнд Эклц чолуг кен тәвсмб?

⁸ Һазр дорас теңгс һарчахд, Терүнә үүдиг кен хаав?

⁹ Би терүг үүләр ораһад, Терүг харңһуд орулад,

¹⁰ Терүнә меҗәһинь керчәд Болн төдглдг үүд тәвләв.

¹¹ Би келләв: «Энүнд күрхич, зуг цаарандан биш. Энд чини күчтә дольгана меҗә».

¹² Чи нег дәкҗ болв чигн өрүнд заквр өглч, Өр цәәлһнд орм зааҗ өглч?

¹³ Һазрин захас тер бәрәд, Хар саната әмтиг уңһав:

¹⁴ Шаврт тамһ тәвсн мет оңдарулхин төлә, Хувцна көвән бәәдлтәһәр тегшлүлхин төлә,

¹⁵ Хар саната әмтнәс герл булаҗ авхин төлә, Өргсн һаринь хамхлгдхин төлә тиигв.

¹⁶ Теңгсин эклцд чи күрлчи? Усна йоралын эс меддго ормар чи йовлчи?

¹⁷ Үклин үүдн чамд үзгдлү, Таг харңһуһин үүд чи үзлчи?

¹⁸ Чи һазрин өргниг шинҗлвчи? Энүнә тускар цугтаһинь меддг болхла, келҗ өг.

¹⁹ Герлин бәәрнә хаалһ альдв, Харңһуһин гер альдв?

²⁰ Терүг хәрү ормднь күргхийч, Гер талнь хаалһинь олҗ авхийч?

²¹ Чи цугтаһинь меднәч! Чи тиигхд төрсн биләч – Чини насна тонь тиим аһу ик болҗана!

²² Чи цасна бәәрнд орлчи? Чи мөндрин бәәр үзлчи?

²³ Зовлңта цагт эдлх Мини хадһлсн көрң эн, Би энүг дәәлдх өдрт белдҗәнәв.

²⁴ Герл яһҗ тардви? Зүн үзгин салькн һазр деегүр яһҗ көөлддви?

²⁵ Хурин усн гүүдг орм, оһтрһу күрҗңнлһнә хаалһ кен һарһв?

²⁶ Тернь эҗго һазр болн күн уга көдәг услна,

²⁷ Эмнг һазр деер хур орулна, Көк ноһа урһана.

²⁸ Хурт эцк бәәдви? Чиигин дусал кен һарһдви?

²⁹ Кенә дотрас мөсн һардви болн кен теңгрин кору теедви?

³⁰ Тегәд усн чолунла әдл хатурна, Тегәд теңгсин деерк көрнә.

³¹ Плеяд оддын җолаһинь батлҗ чадхвч? Ориона оддын боодһаһинь сулдхҗ чадхвч?

³² Оддыг цаглань һарһҗ чадхвч? Долан бурхн гидг оддыг залҗ чадхвч?

³³ Теңгрин дигдараг меддвч? Терүнә йосиг һазр деер тогтаҗ чадхвч?

³⁴ Усн чамаг элвгәр услдгар үүлнд күргҗ дууһан һарһҗ чадхвч?

³⁵ Һал цәкллһиг илгәҗ чадхвч? Тедн ирәд чамд келдгәр: «Бидн белн!»

³⁶ Кен ибис шовунд цецн уха өгв? Кен эр такад тоолвр өгв?

³⁷ Үүлд тоолх дүңгә кен цецн болҗахмб? Эс гихлә теңгрин бортх көлврүлх,

³⁸ Тоосн бальчг болдгар болн долда шавр наалддгар?

³⁹ Эм арслң бәрҗ авсн тоотыг чи бәрдг болвзач? Чи кичгүдинь цадхҗанч?

⁴⁰ Тедн кевтртән тагчг кевтцхәнә, Тедн бура модн дотр бултад манҗана.

⁴¹ Керәд кен хот белднә? Терүнә һууҗас хот олҗ чадхш, Тедн үүмәд Бурхиг дуудна.