Йов 37 - Хальмг келнд орчулсн Әрүн Бичлһс

¹ Терүнәс мини зүркн чичрнә, Ормасн өсрәд һархдан белн.

² Терүнә чаңһ ду соңстн, соңстн: Терүнә амнас күрҗңнсн дун һарчана.

³ Цуг теңгрәр дун һарчана, Һал цәкллһн һазрин захд күрчәнә.

⁴ Тегәд ода Терүнә дун һарчана, Әвртә сәәхнәр күрҗңнҗәнә. Тер Эврәннь дууһан хааҗахш – Тернь эргмдән соңсгдҗана.

⁵ Бурхн Эврәннь дууһарн өврмҗтәһәр ду һарна, Маднд медҗ болшго алдр кергән кенә.

⁶ Цаснд Тер келх: «Һазр деер ун», Хурин уснд: «Чаңһар асхр!»

⁷ Эннь күн болһна һарт Бурхна тәвҗәх тамһ, Терүнә кергин тускар күн болһн меддгәр тиигҗәнә.

⁸ Тегәд аңгуд нүкндән бултна, Эврәннь ичәндән кевтцхәнә.

⁹ Эврәннь хораһас догшн салькн һарна, Ар үзгәс салькн киит авч ирнә.

¹⁰ Бурхна үләлһнәс мөсн һарна, Усн деерк мөстнә.

¹¹ Чиигәр Тер үүлд дүүргнә, Тер үүлнәс һал цәклүлнә.

¹² Тедн эргнә, бәәдлән сольна, Терүнә седвәриг күцәнә, Моһлцг һазр деегәр Терүнә заасиг кенә;

¹³ Бурхна һазрт хәәрлт чигн, Засглт чигн авч ирнә.

¹⁴ Зогс, соңс Йов, Бурхна өвәрц юмна тускар ухал!

¹⁵ Тедниг Тер яһҗ һарддгинь меднч, Һал цәкллһн яһҗ үүлиг герлтә кедгиг?

¹⁶ Үүлд яһҗ теңгрт бәргдҗәхиг меднч? Терүнә медрл күцц, кергнь сүркә сәәнинь меднч?

¹⁷ Өмн үзгин салькнд һазр тагчгрхла, Чи өмссн хувцнасн бүтнәч.

¹⁸ Чи Терүнлә әдл теңгриг һаңнҗ чадхвч, Батар, нүр үздг мет цутхад?

¹⁹ Мадниг дасх, Терүнд ю келхмб, Бидн белн бишлм, эргмдән харңһу!

²⁰ Терүнд мини келсн үгмүд давтҗ келхий? Терүнлә күүндсн күн – алгдх.

²¹ Салькнд көөгдсн үүлд заагар гилвкәд һарчах герл хәләҗ болхш.

²² Ар үзгәс алтн герл ирх, Бурхна алдр әәлһҗәнә.

²³ Хамгин Күчтәд бидн күршголм, Күчәрн болн үннәрн Тер туурмҗта, Терүнә зөвнь алдр, Кү Тер басшго.

²⁴ Тегәд олнәмтн Терүнәс әәнә, Тер ямаран чигн цецн ухатаг хәләшго!