Йов 36 - Хальмг келнд орчулсн Әрүн Бичлһс

¹ Элигу бас иигҗ немнә:

² – Невчк тесҗә – би чамд үзүлсүв. Бурхна тускар талдан юм чигн келсүв.

³ Би эврәннь Үүдәчин зөвинь үзүлхин төлә, Келхәр бәәхән холас эклсүв.

⁴ Йосндан мини үгмүд худл биш, Чини өмн – күцц медрлтә күн.

⁵ Бурхн күчтә! Тер кенд чигн дурго болҗахш. Тер ухата болн чидлтә.

⁶ Хар саната күүг Тер әмд үлдәшго, Даҗргдснднь – чикәр һарһҗ өгх.

⁷ Тер үннч күүнәс хәләцән бултулшго, Тедниг хаана ширәд мөңкинд суулһх, Тегәд тедниг өөдлүлх.

⁸ Кемр тедн чөдрт бәрәтә бәәхләг, Муульта бәәдлин цевд бәргдсн болхлаг –

⁹ Эннь Тер теднд кергинь, хорта йовдлынь болн деерклһинь зааҗана,

¹⁰ Чикнднь соңсхад, уха орулҗана, Йоснд уга йовдлан хайтха гиҗәнә.

¹¹ Кемр тедн соңсад, Терүнд церглхлә, Тегәд теднә җирһл өлзәтәһәр чилх, Үлдсн җилмүднь сән болх.

¹² Кемр эс соңсхлаг – зерзевәр шаагдх, Тоолвр угадан үкцхәх.

¹³ Хар саната әмтнә зүркнь цухлар дүүрң, Тедниг Тер цевәр орав чигн тедн зальвршго.

¹⁴ Тедн баахн насндан үкцхәнә, Җирһлән аля әмтнлә чиләнә.

¹⁵ Болв угатяг зовлңгас Тер һарһна, Дорацулгдсн әмтнә чикинь сонр кенә.

¹⁶ Тер чамаг бас шаху ормас сарул, Харшлт уга һазрт һарһх билә; Чини ширәг йир сән хотар дүүргх билә.

¹⁷ Болв чи хар саната әмтнд зарһ келгүлхәр седҗәнәч, Чини санан – зарһ болн цааҗ.

¹⁸ Даланала бәәдләс сагл, чамаг бичә авлтха, Авлһ чамаг бичә үрәтхә.

¹⁹ Байн бәәсндән зовлңгас авргдҗ болхий, Нам бәәсн чидләрн агсв чигн?

²⁰ Келнулс кевтән уга болх гиҗ Киидән чи тиим сөөһин тускар ухалҗанач!

²¹ Хорта йовдлд орхасн сагл – Чамд хара биш сөрлт илгәгдҗ.

²² Хәләлч, Бурхн Эврәннь чидләрн алдр! Терүнлә әдл сурһмҗлач бәәнү?

²³ Терүнд кен хаалһинь заахмб? Кен келхмб: «Чи чик бишәр кеҗч?»

²⁴ Олна буульсн Терүнә кергиг Кезә чигн өөдлүлхиг бичә март:

²⁵ Терүг әмтн цугтан хәләнә, Терүг холас һәәхнә.

²⁶ Ээ, Бурхн алдр, мана ухалснас өөдән, Терүнә насна тонь күцгдҗ медгдшго.

²⁷ Усна дусал Тер цуглулна, Тернь хурт хүврәд икәр һооҗна,

²⁸ Үүлнәс асхрна, Әмтиг ик хур норһна.

²⁹ Тер үүлиг яһҗ делгсиг кен медхмб, Терүнә гер оһтрһун дууһар яһҗ күрҗңнҗәхиг?

³⁰ Герләрн терүн деер Бийиннь төлән тархана, Теңгсин йоралыг харңһуһар хаана.

³¹ Тиигҗ Тер келнулсин зарһ кенә, Элвгәр теднд хотынь өгнә.

³² Һартан Тер һал цәклһ бәрҗәнә, Терүнә заасн талнь тернь цокна.

³³ Терүнә тускар оһтрһу зәңглнә, Малмуд юн болҗахинь бас меднә.