Йов 35 - Хальмг келнд орчулсн Әрүн Бичлһс

¹ Элигу цаарандан иигҗ келнә:

² – Чи зөвтәв гиҗ санҗанчи? Чи келҗәнәч: «Бурхн биш, би зөвтәв»,

³ «Нанд юн олз болҗана? Килнц һарһлго бәәхд – юн олзв?» – гиҗ келҗәнәч.

⁴ Терүнд би чамд хәрү өгсүв, Чамд болн чини нәәҗнрт:

⁵ Теңгр тал хәлә – оньган өг, Чини деер олн үүлн ямаран өндрт бәәнә!

⁶ Кемр килнц һарһсн болхлаг – Бурхнд ю кеввч? Му йовдл икдүләд – Терүнд ю үзүлҗәнәч?

⁷ Кемр чи үннч болхлаг – Терүнд ю өгчәнәч, Тер ю чини һарас авхмб?

⁸ Чини му йовдл, Чини үннч бәәдл зуг әмтнд күрх.

⁹ Олн даҗрлһнас әмтн түңшҗәнә, Чидлтә күүнә һарас сулдхар сурҗана.

¹⁰ Болв нег чигн күн келшго: «Сөөһәр маднд ду белглдг Бурхн – Мини Үүдәч альдв?

¹¹ Һазр деерк аңгудас мадниг ухаһар болн цецн белгәр теңгрин шовудас йилһсн Терий?»

¹² Кемр тедн хәәкрхлә – теднә хар сананас болн деерклһнәс көлтә Тер хәрү өгчәхш.

¹³ Бурхн хоосар эрәд сурсиг соңсхш, Хамгин Күчтә терүг эс үзсәр бәәнә.

¹⁴ Терүнәс даву Терүг үзҗәхшв гиһәд, Терүг зарһд күләҗәнәв гиҗ чи келҗәнәч.

¹⁵ Дәкәд бас – Терүнә цухл адһҗахш гиһәд, Дутудундынь Тер икәр үзҗәхш гиһәд?!

¹⁶ Уга, Йов киидән келҗәнә, юм ухаллго олн үг келҗәнә.