Йов 34 - Хальмг келнд орчулсн Әрүн Бичлһс

¹ Элигу иигҗ цаарандан келнә:

² – Цецн әмтн, намаг соңстн, Меддг әмтн нанд оньган өгтн,

³ Яһад гихлә чикн үгмүд келсиг таньна, Келн хотын амт медснлә әдл.

⁴ Чикәр шүүҗ авхмн, Юн сәнсәәхн болҗахинь Хоорндан медҗ авхмн.

⁵ Йов иигҗ келв: «Мини зөв, Бурхн нанд зарһ кехәр бәәхш.

⁶ Би зөвтә болв чигн – худлчнрин тоод орулгдв, Буру уга бийнь эдгдшгоһар шавтулгдув».

⁷ Йовла әдл күн бәәдви? Даҗрлһиг тер ус ууҗах мет келнә.

⁸ Хорта әмтнлә тер негднә, Хар сана һарһҗах әмтн дунд тер йовна.

⁹ Тер келлүс: «Бурхнд таасгдхар седсн күүнд олз уга».

¹⁰ Тегәд – ухата залус соңстн намаг: Бурхн му йовдл һарһшго, Хамгин Күчтә хорта йовдлас хол!

¹¹ Әмтиг Тер кесн кергәрнь ашлна: Күн болһн эврәннь күцәмҗәрн авчана.

¹² Бурхн үнндән хорта йовдл һарһҗахш, Хамгин Күчтә зарһин зөвиг хаҗилһҗәхш.

¹³ Терүг һазриг һардтха гиҗ кен тәвв? Терүнд кен цуг делкәг өгв?

¹⁴ Кемр Тер Эврәннь зүркән хааһад, Эврәннь әмсхлән Бийдән авсн болхла –

¹⁵ Әмтәкиитә кевтән тер дарунь үкх билә, Тегәд күн дәкн тооснд хүврх билә.

¹⁶ Кемр чамд ухан бәәхлә – соңс, Мини келснд чикән өг!

¹⁷ Үнн юмнд дурго күн һардҗ чадхий? Үннч болн Күчтә Бурхиг зарһд орулхийч?

¹⁸ Хаанд «кишго күнч!» – гиҗ келдгинь, Эркшилтә байн күүг «хар саната!» – гиҗ нерәддви?

¹⁹ Болв Бурхн һардачнрт таасгдхар седдгонь, Байн күүг, угатя күүг деегшән тоолхш. Юңгад гихлә тедн цугтан – Терүнә һарар үүдәгдсмн.

²⁰ Тедн сөөһәр генткн үкцхәнә, Келнулсиг үүмүләд уга болцхана, Күчтәнь хольвлгдна, зуг күүнә һарар биш.

²¹ Бурхн күүг мөрдәд хәләнә, Терүнә ишкдлиг кевтнь үзнә.

²² Хорта йовдл һарһдг әмтнд бултдг Таг харңһу болн бүрңк цаг уга.

²³ Яһад гихлә күүнд Бурхн тал зарһд одх болзг һарһад керг уга.

²⁴ Бурхн күчтә әмтиг сурлго цокад уңһана, Теднә ормд талдан улсиг тәвнә.

²⁵ Яһад гихлә Тер теднә керг меднә, Дәкәд нег сө цугтаһинь каалад күүлнә!

²⁶ Цугтаннь нүүрт тедниг хар саната әмтнлә әдләр алх.

²⁷ Яһад гихлә Бурхна мөрин тускар эс ухалснд Тедн Терүнәс буру хәләнә.

²⁸ Тегәд угатя улсин дун Терүнд күрч, Дорацулгдсн әмтнә түңшлһ Тер соңсв.

²⁹ Кемр Тер тагчг бәәхлә – Терүг кен гемшәхмб? Кемр Эврәннь чирәһән бултулхла – Терүг кен үзхмб? Тиим йовдл олнәмтнлә болн күүнлә болдмн,

³⁰ Яһад гихлә Бурхнд иткдго күн әмтнд хавх тәвәд бичә нойрхтха гинә.

³¹ Бурхнд иигҗ келсн сән болвза: «Намаг засглв – дәкҗ би килнц һарһшгов.

³² Мини меддгог нанд дасх, Кемр му юм һарһсн болхла – дәкҗ кешгов».

³³ Кемр чи буруһан эс һарһсн болҗахла Ю күләҗәнч? Би бишв, чи эврән шиидвр авх зөвтәч. Юм меддг болхла – келҗ өг!

³⁴ Тоолврта әмтн келх, Намаг соңсҗах цецн күн келх:

³⁵ «Йов меддго юман келҗәнә, Терүнә үгнь чинр уга».

³⁶ Йов хар саната әмтнлә әдл келҗәхлә, Терүг кевтнь сөртхә.

³⁷ Яһад гихлә килнц деерән тер деегүр бәәдл немҗәнә, Альхан ташад, маднд дөөглнә болн Бурхна өмнәс эврәннь келән икдүлҗәнә.