Йов 33 - Хальмг келнд орчулсн Әрүн Бичлһс

¹ Тегәд Йов, мини келсиг соңс, Үг болһиг тодлад ав!

² Ода би аман секҗәнәв! Мини келн экләд келҗәнә.

³ Мини зүркн үннәр келҗәнә, Амнасм цевр үнн һарчана.

⁴ Намаг Бурхна Сәкүсн үүдәлә, Хамгин Күчтән әмсхл нанд әм орулла.

⁵ Кемр чадхла – чи нанд хәрүһинь өг, Ноолданд ор, өмнм һарад зогс!

⁶ Бурхна өмн би чамла әдл болҗанав, Би бас шаврар кегдләв!

⁷ Би чамаг әәлһҗәхшв, Мини даҗрлһн чамд күнд болшго.

⁸ Чамаг мини чикнд келсн Үгмүдин әәһинь би соңслав:

⁹ «Би цеврв, һаң угав болн килнцд орсн угав, Нанд буру уга!

¹⁰ Бурхн намаг Эврәннь дәәсн гихәр, Мел бурушахар хәәһәд бәәнә,

¹¹ Мини көлд чөдр өлгнә, Хаалһим кевтнь хәләнә».

¹² Хәрүднь би келх биләв: чи зөвтә бишич, Бурхн күүнәс иклм!

¹³ Яһад чи Терүг гемшәҗәнәч: Тер чамд хәрү өгчәхш гиһәдий?

¹⁴ Бурхн нег дәкҗ келнә, Эс медхлә хойрдад келнә.

¹⁵ Орндан орад әмтн нөөртән сөөһин үзгдл үзнә.

¹⁶ Тегәд Тер теднә чикнднь келнә, Керлдлһәрн тедниг әәлһнә:

¹⁷ Күүг му кергәснь татҗ авхин төлә, Терүнәс деерлклһ салһхин төлә,

¹⁸ Йорал уга һазрт терүг унхаснь бәрхин төлә, терүнә җирһл үкләс саглна.

¹⁹ Эс гихлә Бурхн күүг кевтртнь гемәр засглна, Терүнә яснд агчмд чигн амрлт уга.

²⁰ Тиигхлә терүнә геснд өдмг орхш, дурта хотнь җигшүртә болна.

²¹ Цогцнь шүүрәд, ода тернь үзгдҗәхш, Махар бәргдсн урднь эс үзгдҗәсн яснь һарчана.

²² Тер күн үкәрин амнд, Үклдән өөрдҗ ирв.

²³ Болв хаҗуднь Бурхна элчхарсач – миңһнә негнь – зогсҗахла, тер зовҗах күүг чик хаалһд орулдг,

²⁴ Терүг хармнад келх: «Сулдх терүг, үкәрт бичә орул, Би терүнә төлә алв өгнәв», –

²⁵ Терүнә цогц баһ настаһан әдл шинрх, Тертн тегәд баһрад одх.

²⁶ Бурхнд тер зальврад орулҗ авгдх. Байрлхларн Бурхна чирә үзх, Бурхн терүнд үнн бәәдлинь хәрүлх.

²⁷ Әмтн тал хәләһәд тер келх: «Би килнцтәв, үнниг хаҗилһв, Болв Тер кеснкүцәсим шоодад нанд засглһ кесн уга.

²⁸ Тер мини әмиг үкәрәс хулдҗ авв, Би герл үзхв!»

²⁹ Энүг кевтнь Бурхн күүнә төлә кенә – Хойр, һурв дәкҗ кенә.

³⁰ Терүг үкәрәс харсҗ авхин төлә, Җирһлин герл терүнә төлә гилвкүлдгәр тиигнә.

³¹ Оньган өг, соңс Йов, Тагчгр – би келнәв!

³² Кемр нанд хәрү өгх үг бәәхлә кел, Би байртаһар чамаг зөвтә гисүв.

³³ Кемр уга гихлә – намаг соңс, Тагчгр, би чамд цецн уха заасув.