Йов 32 - Хальмг келнд орчулсн Әрүн Бичлһс

Элигун келсн үг

¹ Тегәд Йовин һурвн үүрмүд терүнлә зүткдгән уурцхав. Йов эврән бийән зөвтәд тоолҗав.

² Болв Барахелан көвүн Элигу, Раман отгин Бузан хөөт үй, дегд уурлв. Бурхиг биш, бийән зөв гиҗәснд тер Йовд уурлв.

³ Элигу терүнә һурвн үүрмүдт бас уурлв, юңгад гихлә тедн хәрү өгч чадсн уга, теднәһәр болхла Йоваг буру гиҗ тоолҗана.

⁴ Болв Элигу Йовата күүндхәсн болһаҗав, юңгад гихлә тедн һурвулн ах бәәҗ.

⁵ Зуг теднд келдг хәрү уга болхла, дегд уурлв.

⁶ Бузан хөөт үй, Барахелан көвүн Элигу иигҗ келнә: – Би насарн баахн биләв, Тадн болхла – көгшд; Тегәд би ичдг, әәдг биләв. Зуг медсән таднд келҗ өглго бәәләв.

⁷ Болв би шиидләв: көгшнь келтхә, Медәтә насн цецн уханд дасхтха.

⁸ Тегәд күүнд сүмсн бәәнәлм, Хамгин Күчтәһин үләснь серл орулна!

⁹ Һанцхн көгшд цецн болдгнь үнн биш, Зуг медәтәнь чикәр тәәлх гиснь бас үнн биш.

¹⁰ Ода би тегәд келсв, тадн соңстн, Би медснәсн келҗ өгсв!

¹¹ Би тадниг келәд дуустл күләләв, Үгән төвләд автл, Тадна цәәлһвртд оньган өгдг биләв.

¹² Би тадна келсиг оньган өгч соңслав – Болв таднас нег чигн күн Йоваг бурушасн уга, Нег чигн күн терүнд хәрү өгсн уга.

¹³ Тегәд цецн ухата болвидн гиҗ бичә келтн – Күн биш, зуг Бурхн терүг илдкх гисәт!

¹⁴ Терүнә үг нанд нерәдгдҗәхш, Би терүнд таднла әдләр хәрү өгшгов.

¹⁵ Тедн әәҗәнә, дәкҗ юм келҗәхш – Теднд келх үг үлдсн уга.

¹⁶ Кемр тедн тагчг бәәхлә, тегәд би ю күләхмб, Мел юм келлго зогсҗацхану?

¹⁷ Эврәннь саамдан би бас хәрү өгсүв, Би медсән бас келҗ өгнәв.

¹⁸ Мини үгмүд деврҗәнә, Мини седкл нанд амрлт өгчәхш.

¹⁹ Дотрм чаһр хаагдсн мет болҗана болн шин бортхла әдләр хаһрҗанав.

²⁰ Келҗ өгнәв – нанд амр болх, Тегәд хәрү өгнәв!

²¹ Өмнән кен бәәхинь хәләшгов, Кенднь чигн таасгдхар бәәхшв,

²² Би таасгдҗ чаддгов, Эс гиҗ Үүдәч намаг уга кетхә!