Йов 31 - Хальмг келнд орчулсн Әрүн Бичлһс

¹ Нүднләһән би бооца келәв, Күүкдиг би хәләшго боллав.

² Бурхнас ода ямаран хөв нанд деерәс ирҗәхмб? Хамгин Күчтәһәс ода ямаран заян нанд деерәс ирҗәхмб?

³ Хар саната күүнд зовлң эс илгәгдҗәнү, Килнц һарһдг күүг муульта бәәдл эс күләҗәнү?

⁴ Эс гихлә Тер мини мөриг үзҗәхший, Мини ишкдлиг тоолҗахший?

⁵ Мекәр би бәәсн болвзав, Эс гихлә хорта йовдл һарһхар адһвий?

⁶ Намаг Бурхн төв чиңнүрт чиңнүрдтхә – Намаг килнц угаг Тер медх!

⁷ Кемр мини ишкдл мөрәсн хаҗисн болхла, Кемр мини зүркн хәләцим дахсн болхла, Кемр мини альхнд бузр юмн наалдсн болхла –

⁸ Тиигхлә мини тәрсиг талдан күн идтхә, Тиигхлә экләд урһҗах мини тәрән уңгарн таслгдтха.

⁹ Кемр мини зүркн күүкд күүнд авлгдҗасн болхла Болн хоша бәәх күүнә үүднд гетҗәсн болхла –

¹⁰ Тиигхлә талдан күүнә төлә мини авсн гергн теермдтхә, Терүнлә талдан күн кевттхә!

¹¹ Яһад гихлә эннь аля йовдл, Зарһд орх му йовдл.

¹² Эннь – үмс һарһдг һал, Эвдрлтд күргәд шатана, Мини олсн олзиг уңгарнь уга кенә.

¹³ Кемр ялчнр нанд һундхла, Би теднә зарһинь эс соңссн болхла, –

¹⁴ Кемр Бурхн харсхар босхла, ю кех биләв? Кемр нан тал ирхлә ю келхүв?

¹⁵ Намаг геснд үүдәсн Бурхн – тедниг чигн эс үүдәв? Мадниг Тер Эврән эс үүдәв!

¹⁶ Угатя күүнд сурсинь «уга» гиҗ келвү, Эс гихлә нанас көлтә белвсн күүнә нүдинь эс цуцрави?

¹⁷ Эврәннь зүсм хотан би һанцарн идвү, Өнчнөвүлә эс хувалцву?

¹⁸ Уга, би баһ наснасн өнчн күүнд эцкләнь әдл боллав, Бичкнәсн белвсн әмтнд түшг боллав!

¹⁹ Кемр би йилһән уга бәәдләр хувцн уга күн яһҗ көрчәхиг хәләҗәсн болхла, Угатяд хучдг юмн угаг хәләҗәсн болхла,

²⁰ Кемр тер намаг эс әдслсн болхла, Мини хөөдин ноосн терүг эс дуладхсн болхла,

²¹ Кемр балһсна ик үүднд намаг дөңнхиг медәд бәәҗ, би өнчнөвү күн тал һаран өргсн болхла –

²² Тиигхлә мини һар хагсад унтха, Тиигхлә һарм тохаһарн хуһртха!

²³ Болв Бурхнас нанд зуг әәмшг болн дәврлһн, Нанд Терүнә алдриг дааҗ болшго!

²⁴ Кемр би алтнд нәәлсн болхла, Нухмл алтна тускар: «Мини харсач эн!» – гиҗ келсн болхла,

²⁵ Кемр би эврәннь зөөрт ямаран ик гиҗ байрлсн болхла Болн яһҗ һарм ик юм авсмн болхла,

²⁶ Кемр би нарна герл Болн сарин гилвксн йовдл үзәд,

²⁷ Би зүркәрн нуувчар авлгдсн болхла, Би теднд мөргәд бийинь һаран үмссн болхла –

²⁸ Эннь зарһд орулх керг болх билә. Тегәд Хамгин Деерк Бурхн керго гиһәд би зарлх биләв!

²⁹ Би дәәснәннь зовлңд байрлх билү, Терүнд хорта йовдл учрхла, би дүрклх билү?

³⁰ Уга, би келәрн килнц һарһсн угав, Үкүлх харал терүнә җирһлд тәвсн угав!

³¹ Мини сег дотр әмтн иигҗ келсн угай: «Мадниг цугтаһинь цадтлнь махар тоох».

³² Йовцн талын күн һаза хонсн уга: Терүнә төлә мини үүдн секәтә билә.

³³ Би талдан әмтнлә әдл Эврәннь му йовдлан бултулсн болвзав, Эврәннь хар санаһан өвртән бултулсн болвзав?

³⁴ Олнәмтнәс әәһәд, Төрлмүдин дурго боллһнас әәһәд – Тагчград гертәсн һазаран һарлго бәәви?

³⁵ О, кемр тадн намаг соңссн болхлаг! Мини сүүлңк үг эн – Хамгин Күчтә хәрү өгтхә! Мини Бурушагч нанд цаас бичтхә –

³⁶ Тер бичвриг ээм деерән авч йовх биләв, Бий деерән титмлә әдләр тәвх биләв.

³⁷ Бурхнд Би бийиннь җирһлән келҗ өгх биләв. Терүн тал нойн мет өөрдх биләв.

³⁸ Кемр мини килнцин тускар һазрм уульҗахла, Тәрәнд хаһлсн меҗәс цугтан уульҗахла,

³⁹ Кемр би өңгәр терүнә темс идҗәсн болхла, Тәрәчнрин әминь таслсн болхлаг –

⁴⁰ Тиигхлә буудян ормд хатханчг өвсн урһтха, Ичмәнә ормд – буг өвсн. Энүгәрн Йов үгән төгсәв.