Йов 30 - Хальмг келнд орчулсн Әрүн Бичлһс

¹ Ода болхла нанас баахнь намаг наад бәрҗәнә, Нам мини мал хәләҗәсн нохас тал Теднә эцкнриг би өөрдүлшго биләв.

² Теднә чидлнь баһрҗ одсн болхла, Һариннь күчн нанд юмб?

³ Түрү бәәдләрн болн харһнлһарн зовҗана, Тедн хагссн һазр әмн уга теегт харңһуд мөлҗҗәнә;

⁴ Нигт урһмл дотрас һашун өвс таслна, Бура модна уңг теднә хот.

⁵ Тедн әмтн дундас көөгдв, Тедниг хулхачнр гиһәд хәәкрнә.

⁶ Һолын хагссн һуурһлд тедн бәәх, Чолун дотр, һазрт һарһсн нүкнд бәәх;

⁷ Бура модн дотр мал мет тедн уульцхана, Буг өвсн дотр цугтан хамдан баглгдҗана:

⁸ Нернусн уга, күүнд керго, Һазрасн көөгдсн әмтн.

⁹ Теднд би бас наадн болв, Теднд нам зоогта үлгүр болв!

¹⁰ Нанд дурго болна, нанас зулна, Намаг үзхләрн нульмлго бәәхш.

¹¹ Харм төрхд, мини саадгин көвч тер сулдхва – Тегәд тедн мини өмн хазаран хайв.

¹² Эн кишго әмтс барун талас дәврнә, Тедн намаг көл деерәсм уңһала. Намаг алхар эврәннь мөрән нан тал һарһна,

¹³ Мини хаалһиг кевтнь хаацхав, Тедн мини үкләс олз һарһҗ авхар белдҗәнә – Тедниг кен чигн күн зогсаҗ чадшго!

¹⁴ Эрс хамхлад, өргн ормар нан тал аашцхана, Аюл салькнла әдл дәврнә.

¹⁵ Нан деер әәмшг буув – Күндллһиг салькнла әдләр тарав, Сән бәәдл үүлнлә әдләр нүүһәд давв.

¹⁶ Мини чееҗин әмсхл чилв, Һашута өдрмүд намаг бәрв.

¹⁷ Сөөд ясн яарна, Өвдкүр намаг зогсл уга шимҗәнә.

¹⁸ Өмссн хувцм ик чидләр таслҗ тәәлгднә, Киилгин зах мет намаг шахна.

¹⁹ Намаг бальчгт Бурхн хайв, Би тоосн болн үмсн болв.

²⁰ Таниг би дууднав, Та зуг хәрү өгхшит. Тана өмн зогсҗанав – Та намаг нам хәләхшит,

²¹ Та нанд догшрхвт, Та эврәннь догшн һарарн мини өмнәс дәәлдҗәнәт;

²² Та намаг өргәд ик хү салькнд бәрүлвт, Эргүлҗ цокулвт –

²³ Би меднәв: Та намаг үклд дахулҗ йовнат, Ода әмд бәәх улс цугтан орх орм тал дахулҗанат!

²⁴ Хөв дуту күн тал үкҗәх кемлә дөң сурҗахла һаран өргдви?!

²⁵ Би зовлңгта күүнә төлә уульдг эс билү? Угатя әмтнә төлә седклм зовдг эс билү?

²⁶ Хөвкишг күләләв, болв хар санан һарв; Герл күләвүв, болв харңһу болв:

²⁷ Мини дотрк буслад тогтнҗахш, Муульта өдрмүд мини өмнәс аашна.

²⁸ Би харлад йовҗ йовнав, нарнас биш; Әмтн хурсн һазрт босад хәәкрнәв, дөң сурнав.

²⁹ Би ода шаһл чонд төрл болҗанав, Страус шовуна иньг болв.

³⁰ Мини арсн харлад унҗана, Мини ясиг халун хатаҗана.

³¹ Ода мини ятх уульҗана, Мини бүшкүр уульдг гергн мет түңшҗәнә.