Йов 3 - Хальмг келнд орчулсн Әрүн Бичлһс

Йовин энлһн

¹ Дарунь Йов үг келәд, һарсн өдрән харав.

² Йов иигҗ келнә:

³ – Тер мини һарсн өдр, тер «көвүн тогтва» гисн сө билрәд уга болтха!

⁴ Тер өдр харңһуд хүвртхә, Теңгрт Бурхн терүнә тускар бичә сантха, Терүнд герл бичә тустха.

⁵ Тер харңһуд ортха, Таг харңһу терүг бүслтхә, Үүлн бүркг, араха бәрг.

⁶ Тер сө харңһуһар даргдг, Тернь җилин өдрт бичә ортха, Тернь сарин тоод бичә ортха.

⁷ Тер сө хусрң болтха, Байрлх ду бичә медтхә.

⁸ Теңгсин адус серүлҗ чадх Өдр харадг бөөтә әмтн, Тер сөөг бас харатха.

⁹ Терүнә одд бүрүллә унтртха, Болв киидән өр цәәхиг күләх, Түрүн толинь чигн үзш уга.

¹⁰ Юңгад гихлә мини экин омаг хаасн уга, Намаг зовлңгас бултулсн уга.

¹¹ Юңгад би гесн дотр үксн угав, Геснәс һарн эс үксмб?

¹² Юңгад намаг өвдг деерән авсмб? Юңгад көкән көкүлсмб?

¹³ Би тогтун кевтх бәәсн, Би ода амрчах биләв.

¹⁴ Тосхсн тоотнь нурҗ одсн һазрин хаадудла Болн теднә сөөвңгүдлә,

¹⁵ Цаһан мөңгәр герән дүүргсн Болн алт хурасн зәәсңгүдтә Хамдан кевтх биләв.

¹⁶ Әмн угаһар һарсн нилхс дунд, Герл эс үзсн нилхс дунд Намаг оршасн болхнь.

¹⁷ Тенд цеврцер биш әмтнә үүмән тогтнна, Тенд дегд цуцрсн әмтнд амрлт ирнә.

¹⁸ Тенд бәрәнә әмтиг гиигн бәәдл күләҗәнә, Тенд маначнрин дун соңсгдхш.

¹⁹ Тенд тоомср угань чигн, Алдрнь чигн хамдан, Тенд ялч нойнасн сул.

²⁰ Юуни төлә зовҗахднь – герл, Дааҗ чадшгоднь – җирһл өгдв?

²¹ Үклән тедн күләҗ ядҗана, зөөр мет терүгән хәәҗәнә.

²² Үкәрин амнд тедн җирһнә, байрлна, нәәрлнә.

²³ Тиим күүнә хаалһнь харңһу, Терүнд Бурхн альд чигн боомтг кенә.

²⁴ Ода әмсхл мини өдмг болв, Нульмсм усн мет асхрҗана.

²⁵ Әәҗәсн юмн ода учрв, Әәҗәсн юмн нанд ирв.

²⁶ Зуг нанд эвтә чигн, Амулң чигн бәәдл уга, Амрлт чигн уга – зуг үүмән.