Йов 29 - Хальмг келнд орчулсн Әрүн Бичлһс

Йовин келсн үг

¹ Йов цаарандан иигҗ келнә:

² – О, кен нанд давсн цагим хәрү эргүлхмб: Намаг Бурхна хәләҗәсн тер өдрмүдиг,

³ Терүнә гегән герл мини толһа деер өгчәсн цагиг, Терүнә герләр би таг харңһу дотраһар йовсиг?

⁴ Бурхна иньгллт мини сег деер бәәхд Хамгин сән өдрмүдм тиим болдмн.

⁵ Хамгин Күчтә нанла бәәхд тииглә болн нанла мини герин әмтн хаҗудм бәәхд;

⁶ Мини хаалһ үсәр уһагдҗала, Уулын хад нанд сән тос һарһҗала.

⁷ Тер цагт би балһсна үүднд оддг биләв, Талвң деер эврәннь ормд суухин төлә –

⁸ Баахн көвүд намаг үзхләрн, хооран һардмн, Көгшд бослдад зогсцхадмн.

⁹ Һардачнр үг келхәсн эмәдмн, һарарн аман хаадмн,

¹⁰ Сәәчүдин дунь тасрдмн, Таңнаднь келнь наалддмн.

¹¹ Намаг соңссн күн нам бийим хөвтәд тоолдмн. Намаг үзсн күн бийим буульдмн:

¹² Угатя күүнд кергтә дөңгинь өгснд болн харсдг күн уга өнчиг аврдгт.

¹³ Үкләс татҗ авгдсн күүнә йөрәл нанд буудмн, Белвсн күүнә зүркнд би байр орулдг биләв.

¹⁴ Би үннәр хувцар мет бийән орадг биләв, Зөвйосн нанд махлакүлт болдмн.

¹⁵ Сохр күүнд би нүднь болдг биләв болн доһлң күүнд – көлнь;

¹⁶ Хөв уга әмтнд би эцкнь болҗ йовлав болн таньдго күүнә түрүкүндинь йилһдг биләв;

¹⁷ Хар саната күүнә шүдинь күүлдг биләв, Терүнә амнаснь олсн зөөринь буладг биләв.

¹⁸ Би эврәннь гертән үкхнь гиҗ санҗалав, Мини өдрмүд, элснлә әдл, то уга болһлав:

¹⁹ Мини уңг уснд күрчәнә, Мини ац деер чиг хонҗана.

²⁰ Мини туурмҗ бөкшго, Мини һарт саадг батар бәрәтә.

²¹ Әмтн намаг соңсдмн, Тедн мини селвг тагчгар күләдмн.

²² Намаг келснә хөөн теднд немдг юмн уга болдмн. Тедниг мини үгмүд таалдмн.

²³ Тедн мини келхиг хур мет күләв, Хаврин усн мет амарн хавлв.

²⁴ Кемр намаг инәхләг, иткдго билә, Мини җөөлн хәләц хәәдг билә.

²⁵ Эврәннь баг дунд бәәх хан мет теднд би хаалһинь заалав, теднд толһачнь боллав. Һундлд бәргдсн әмтиг тогтнулҗах күүнлә әдл би биләв.