Йов 28 - Хальмг келнд орчулсн Әрүн Бичлһс

Берк Цецнә туск дун

¹ – Тегәд цаһан мөңгн һардг орм бәәнә, Алт цеврлдг беш бәәнә.

² Төмриг һазрас авна, Улан мөңгиг чолунас хәәлҗ авна.

³ Харңһуг әмтн уурулҗана, Хамгин гүүнднь күрч йовна. Тенднь зуг чолун болн таг харңһу.

⁴ Әмтн уга һазрт көндә орм һарһна, Кен чигн күүнә көл ишкәд уга тенднь. Дәкәд тиигән деесәр бууҗах әмтн һазр дор цугтаһаснь холд өлгәтә болна.

⁵ Өдмг өгчәх һазрнь, Гүүндән һалар шатагдҗах мет.

⁶ Терүнә ова чолун дотр сапфир бәәнә болн алтна умш бултҗ.

⁷ Тиигән һардг җим хаалһиг һәрд шовун чигн медәд уга, Начн шовуна нүдн чигн үзәд уга;

⁸ Зерлг аң терүгәр ишкәд уга, Арслң аң йовад уга.

⁹ Әмтн хад көндәнә, Уулыг уңгарнь сөңглнә;

¹⁰ Чолун дотркиг малтна, Зүснзүүл үнтә зөөр нүднд үзгднә.

¹¹ Тедн һолын экнд күрнә, Бултулгдсн юмиг секнә.

¹² Болв цецн ухан альдас авгдв, Альд тоолвр бәәдви?

¹³ Терүнә үниг күн медәд уга, Эн делкәд терүг олҗ болшго.

¹⁴ Йорал уга орм келх: «Нанд тер уга». Теңгс бас келнә: «Нанд бас уга».

¹⁵ Цевр алтар терүг хулдҗ авч болшго, Цаһан мөңг терүнә төлә өгч болшго.

¹⁶ Терүг Офирин алтар чигн хулдҗ авч болшго, Ониксәр чигн, сапфирәр чигн.

¹⁷ Терүнлә алтн чигн, үнтә шил чигн әдлцшго. Үнтә алтн савас терүг сольҗ авч болшго.

¹⁸ Молрин тускар, шурин тускар ухалад керг уга. Цецн уха олҗ авхд сувсн чолу олҗ авснас күнд.

¹⁹ Кушин һазра топаз терүнлә әдлцшго болн цевр алтар хулдҗ авч болшго.

²⁰ Тегәд альдас цецн ухан ирдви, Серл ухан альд бәәдви?

²¹ Әмд тоотын нүднәс тер далд бәәнә, Нам теңгрин шовудас тер бултулгдҗана.

²² Терүнә тускар Эвдрлһнә һазр болн Үклин һазр медүлнә: «Зуг зәңг маднд күрв».

²³ Болв Бурхн терүн талк хаалһиг меднә, Зуг Тер бәәх орминь меднә:

²⁴ Терүнә хәләц һазрин захд күрнә, Теңгр дор бәәхиг кевтнь Тер үзнә.

²⁵ Тер салькна күчиг тогтаҗахдан, Усна меҗә тогтаҗахдан,

²⁶ Хурт дигдара һарһҗахтан, оһтурһута аюлд хаалһинь зааҗахдан –

²⁷ Тиигхд Бурхн цецн уха үзлә, Терүг йилһҗ авла, тегәд сөрәд тогтала.

²⁸ Күүнд Тер келв: «Деед Эзнәс әәлһн – энүнд цецн ухан болҗана, Хорта йовдлас зуллһн – энүнд серлухан болҗана».