Biblia Todo Logo
Bìoball air-loidhne

- Sanasan -

Йов 27 - Хальмг келнд орчулсн Әрүн Бичлһс

1 Йов цаарандан иигҗ келнә:

2 – Мини зарһ эс кесн әмд Бурхар андһар тәвҗәнәв! Намаг һундасн әмд Хамгин Күчтәһәр андһар тәвҗәнәв –

3 Мини әмсхл чилтл, Бурхна әмн дотрм бәәтл,

4 мини амнас хаҗһр юмн һаршго болн келм худл келшго.

5 Би тадниг зөвтә гиҗ тоолхас холв, Әмд деерән эврәннь цевр бәәдләс салшгов.

6 Эврәннь зөвән бәрҗәнәв, терүнәс хоцршгов; Давсн җирһләсн би ичҗәхшв.

7 Мини дәәсн хар саната әмтнә тоод ортха, Нанд дурго күн хорта әмтнә тоод ортха!

8 Бурхн терүг һәәлснә хөөн, Терүнә әминь таслсна хөөн Бурхнд шүтдго күүнд нәәлх юмн уга.

9 Терүг зовлң дәврхлә, Бурхн терүнә хәәкрсиг соңсхий?

10 Хамгин Күчтәд тер хәәрлт олхий? Ямаран цагт чигн тер Бурхиг дуудхий?

11 Би таднд Бурхна кергин тускар келсв, Хамгин Күчтән седвәриг бултулхшв.

12 Тадн бийстн үзвт. Тегәд хоосн күүндвр юуна төлә кегдҗәхмб?

13 Бурхнас хар саната күүнд күртх хөвнь тиим болдг, Хамгин Күчтәһәс деермч күн тиим юм авх:

14 Терүнә үрд олн болтха, Теднь хурц үлдлә харһх, Терүнә үрд цадтлан өдмг идшго.

15 Терүнәс әмд үлдсинь күнд гемәс үкәрт орулх, Тедниг белвсн гергднь хармнад һундрхҗ уульшго.

16 Цаһан мөңгиг элснлә әдләр тер хоршатха, Хувцнь бальчгшавр болтха.

17 Терүнә хадһлҗасиг үннч күн өмсх, Буру угань терүнә цаһан мөңгинь авх.

18 Терүнә гер – аралҗна гүлмн, Тәрәнә маначин сег.

19 Тер байн күн кевтә унтх, болв: Өрүнднь нүдән секхлә – бәәсн юмнь уга.

20 Усна аюл мет терүг әәмшг бәрх, Сөөһәр терүг хү салькн хулхалх.

21 Дорд үзгин көдәһәс терүг хү салькн өргәд авч йовх, Ормаснь уга кех.

22 Терүг хармнл уга дәврх, Терүнә күчнәс хар саната күн ардан хәләлго гүүх!

23 Тегәд әмтн наад бәрәд альхан ташцхах Болн ардаснь ишкрх.

© Институт перевода Библии, 2002-2023

Institute for Bible Translation, Russia
Lean sinn:



Sanasan