Йов 26 - Хальмг келнд орчулсн Әрүн Бичлһс

Йовин өгсн хәрү

¹ Йов иигҗ хәрү өгнә:

² – Чидл угад чи юуһарн дөң болвч? Сулдсн һариг – чаңһавчи?

³ Ухаһан гееснд – ямаран селвг өгвч? Туста болхин икәснь келҗ өгвчи?

⁴ Кен чамд тиим кел дасхв? Кен чамд тиим уха орулв?

⁵ Үксн күүнә сүмсн сүрднә, Йоралын усн болн терүн дотр бәәхнь сүрднә.

⁶ Үклин һазр болн Эвдрлһнә һазр Бурхна өмн мел ил.

⁷ Бурхн Ар үзгиг көдә деегүр татв, Тертн һазриг сулар өлгв,

⁸ Бийиннь үүлнд ус цуглулна Болн үүлн күндрсндән шууршго.

⁹ Бийиннь ширәг Тер хаана, Терүг Бийиннь үүләр бүркнә.

¹⁰ Усна төвшүн бәәдл деер герл болн харңһуһин Меҗәһәр төөнг зурна.

¹¹ Теңгриг түшҗәх юмс чичрнә, Терүнә күчтә дуунас сүрднә.

¹² Бийиннь сүркә чидләрн теңгс көдлгнә, Рахаваг ухаһарн ална.

¹³ Терүг үләхлә, теңгр чилгр болна, Терүнә һар мөлкҗ йовх моһаг цумлна.

¹⁴ Эннь терүнә кергин чимкнь! Терүнә тускар бидн зуг әрә шимлдлһ соңснавидн! Терүнә күчтә оһтрһун дууг – кен медхмб?