Йов 24 - Хальмг келнд орчулсн Әрүн Бичлһс

¹ Хамгин Күчтән зарһин болзгнь яһад эс темдглгдсмб? Нам Бурхиг меддг әмтн – Тедн чигн Терүнә өдрмүд үзҗәхш!

² Әмтн меҗән чолусиг көндәнә Болн хулхалҗ авсн малан хәрүлнә,

³ Өнчн күүнә элҗгинь хулхална, Белвсн күүнә царинь бәрүллһнд авна,

⁴ Һуульһнчнриг хаалһас түлкнә, Тегәд угатя әмтн нег цагла бултна.

⁵ Зерлг элҗгнс мет Угатя әмтн теегт һарад, Хот хәәҗ гүүцхәнә, Көдә һазр теднә болн теднә үрдин теҗәл.

⁶ Тедн теегин тәрәг таслна, Хар саната әмтнә уста үзмин үлдл цуглулна.

⁷ Теднд хувцн уга, нүцкәр унтна, Киитнд теднд хуча уга.

⁸ Хур орхла уулд дунд тедн норад чиигтәһәр бәәнә, Хорһдх орм уга болад, хад чолунд шахлдна.

⁹ Хорта йовдл һарһдг әмтн Өнчн күүкдиг көкнәс татҗ салһна, Угатя күүнәс ялын ормд үринь булаҗ авна.

¹⁰ Угатя улс нүцкәр йовцхана, угатяд хувцн уга; Ова өвс зөөнә – бийснь харһнна;

¹¹ Чолуһар тос шахҗ һарһна Болн уста үзм ишкәд шахсн бийнь ундасцхана.

¹² Балһснд үкҗәх әмтнә зовҗах түүрчллһн ик, Шавта әмтн дөңг сурҗацхана. Зуг Бурхн хорта әмтнә йос эвдлһиг оньһҗахш!

¹³ Теднь болхла, герлин өмнәс буцҗана, Терүнә хаалһ медхш, Терүнә мөрәр йовхш:

¹⁴ алач өрин харңһула сернә, Һуульһнчиг болн угатяг ална, Сөөһәр хулхач болна.

¹⁵ Аля кедг күн бүрүл цаг күләҗ келнә: «Намаг кен чигн күн үзшго!» – Чирәһән бултулна.

¹⁶ Сөөһәр герин эрст нүк һарһна, Өдрт болхла тендән бултцхана – герл уга бәәцхәнә.

¹⁷ Өрүн цаг теднд – таг харңһу, Болв үклин сүүдрин әәмшглә тедн иҗлдҗ.

¹⁸ Усн деер тедн торч чадшго, һазр деер теднә бәәрн харалта, уста үзм талнь күн йовхш.

¹⁹ Хагсу болн халун цаг цасна усиг уга кенә, Тедү мет килнцтә әмтиг – үклин һазр.

²⁰ Теднә тускар экин гесн мартх, Өтн тедниг идх, Теднә тускар дәкҗ саншго – Хар санан моднла әдләр хуһлгдх.

²¹ Хусрң гергдт үр һарһдго гиһәд тедн шахна, Белвсн гергдт сән юм үзүлхш.

²² Бурхн болхла Бийиннь күчәрн чидлтәһинь диилнә, Тедн босна, болв әмд үлдх угань медгдҗәхш.

²³ Тер теднд әәмшг уга бәәдл болн дөң өгнә, Теднә хаалһас нүдән хаахш.

²⁴ Әрә өөдлҗ йовад – уга болцхана, Цугтан дегц унцхана, Буудян толһа мет керчгднә.

²⁵ Тиим эс болхлаг, кен намаг худлд илдкх? Кен мини үгмүд бурушах?