Йов 23 - Хальмг келнд орчулсн Әрүн Бичлһс

Йовин өгсн хәрү

¹ Йов иигҗ хәрү өгнә:

² – Мини һундл урдк кевтән һашута, Терүнә күнд һарас би әмсхҗәнәв.

³ Терүг альд олхинь, Терүнә бәәрнд яһҗ күрхинь медсн болхнь,

⁴ Би Терүнә өмн эврәннь кергин тускар келх биләв, Һундлан кевтнь келҗ өгх биләв.

⁵ Би ямаран хәрү өгхинь медх бәәҗв, Би ю келхинь медҗ авх бәәҗв.

⁶ Тер нанла эврәннь цуг күчәрн зарһцх билү? Уга, Тер намаг соңсх билә!

⁷ Тенд чик седклтә күн Терүнлә зүткҗ чадх билә, Би эврәннь Зарһчас мөңкинд сулдхвр авх биләв.

⁸ Болв зүн үзг тал йовнав – Тер тенд уга, барун үзгт чигн Терүг олҗ чадшгов,

⁹ Ар үзгт Бурхн ю кеҗ йовхинь би үзҗәхшв, Өмн үзг тал эргҗ одвчн – би медшгов.

¹⁰ Болв Тер мини хаалһ меднә. Намаг һалд орулад сөрхлә, алтнла әдләр һархв.

¹¹ Терүнә мөрәр көлм чикәр йовла, Терүнә хаалһар хаҗил уга йовлав.

¹² Терүнә заквр алдл уга күцәләв, Терүнә үгмүдиг алдл уга хадһллав.

¹³ Тер һанцарн шииднә – кен зүткхмб? Тер седкл туссарн кенә.

¹⁴ Нанд нерәдсән Бурхн күцәх – Терүнд тиимнь олар хадһлгдҗана.

¹⁵ Тегәд би Терүнәс әәҗәнәв, Ухалсн цагтан – әәһәд чичрәд однав.

¹⁶ Бурхн мини зүркиг әәмтхә кев, Хамгин Күчтә намаг әәлһнә.

¹⁷ Би таг харңһуд уга болсн болхнь, Харңһу мини нүднд туссн болхнь!