Йов 22 - Хальмг келнд орчулсн Әрүн Бичлһс

Һурвдгч күүндвр Элипазин келсн үг

¹ Теманас ирсн Элипаз иигҗ хәрү өгнә:

² – Бурхнд күүнәс тус бәәнү? Нам хамгин ухатань зуг бийдән тусан күргнә.

³ Чини үннәс Хамгин Күчтәд ямаран байр болҗахмб? Чини цеврцер бәәдләс Терүнд ямаран олз орҗана?

⁴ Бурхнас әәснд Тер чамаг керлдхий, Энүнәс көлтә – зарһд орулхий?

⁵ Мел уга! Чини хорта йовдл дегд ик, Йос эвдлһән чи чиләшгоч!

⁶ Керг уга болв чигн чи ахнрдүүнрәсн алв сурҗавч, Әмтнәс бәәсн хувцинь тәәлҗ аввч.

⁷ Мәәрҗ йовсн күүнд ус өгсн угач Болн харһнҗ йовсн күүнәс өдмг хармнвч.

⁸ Чидлтә әмтнд чи һазр өгвч, Деермч әмтн терүн деер бәәцхәв.

⁹ Чи белвсн гергдиг хоосар йовулвч, Өнчн бичкдүдин сүүлңк түшгинь булаввч.

¹⁰ Тегәд чини эргнд хавхс тәвәтә, Генткн әәмшг әәлһҗәнә:

¹¹ Тегәд эн харңһуд чи юм үзҗәхшич, Чамаг усна аюл бүркв.

¹² Бурхн теңгр деер эсий? Деегшән одд хәлә, тедн ямаран өндр!

¹³ Чи келхич: «Бурхн – ю меддв? Таг харңһуһас Тер ю үзҗ келхмб?

¹⁴ Хәләхд Терүг үүлн хааҗана, Теңгрин ораһар йовад Тер мадниг үзҗәхш».

¹⁵ Кезәнә килнцтә әмтнә һарһсн хаалһар Чи цаарандан йовхар бәнчи?

¹⁶ Теднь болзгасн урд җирһләсн хаһцла, Гермүдинь усна урсхул уга келә.

¹⁷ Тедн Бурхнд келлә: «Маднас йов цааран! Хамгин Күчтә маднд ю кеҗ чадхмб?»

¹⁸ Бурхн болхла, гермүдинь зөөрәр дүүргҗәлә! Болв хар саната әмтнә селвгәс би холв!

¹⁹ Үннч күн хәләһәд байрлх, Буру уга күн терүг наад бәрх:

²⁰ «Тегәд мана дәәсн уга болв, Юм үлдәлго һал тедниг зальгчкв!»

²¹ Терүнлә бичә өшәрк, эвц – Тегәд чамд сән бәәдл ирх.

²² Терүнә амнас һарчах сурһмҗ ав, Терүнә келсн үгмүдиг зүркндән орул.

²³ Хамгин Күчтә тал хәрү эрг – күцәмҗтә болх, Зуг килнцән эврәннь сегәс көөһәд һарһ!

²⁴ Эврәннь алтан тоосн гиҗ санхла, Офирәс авсн зөөрән – һолын чолун гихлә,

²⁵ Кемр ова цаһан мөңгнә ормд Хамгин Күчтәнь чини алтн болхлаг –

²⁶ Тегәд чи Хамгин Күчтәд байран олхич, Чи Бурхн тал хәләхич.

²⁷ Терүнд тегәд мөргхич, Тер чамаг соңсх. Чи эврәннь андһаран күцәхич.

²⁸ Ямаран чигн керг күцәхәр седхлә – диилвртә болх. Чини хаалһд герл һарх.

²⁹ Кемр кен чигн басгдсн болхлаг, чи «Деегшән өөдлүлтн!» – гиҗ келхлә Бурхн хәләцнь бөксн күүг аврна.

³⁰ Нам бурута әмтиг Тер харсч авна, Чини цевр бәәдләр харсх.