Йов 21 - Хальмг келнд орчулсн Әрүн Бичлһс

Йовин өгсн хәрү

¹ Йов иигҗ хәрү өгнә:

² – Соңстн, соңстн мини үгмүд, Эннь чигн таднас нанд төвкнүллһн болтха!

³ Намаг келтл тесҗәтн, Келснә хөөн наад бәртн.

⁴ Би күүнд һундҗану? Эс гихлә уурлх төр нанд угай?

⁵ Хәләтн намаг – менрхит, Аман һарарн хаахит.

⁶ Эврән санхларн – әәһәд однав, Тер дарунь чичрәд однав:

⁷ Яһад хар саната әмтн һазр деер бәәдви, Яһад көгшрх дутм теднә күчнь икдәд бәәдви?

⁸ Батрад одсн хөөт үйнр теднлә хамдан, Теднә нүдн хөөт үрдән үзнә.

⁹ Тедн эвтәһәр гермүдтән бәәнә, әәмшг медхш, Тедн деер Бурхна мотр өрггдәд уга.

¹⁰ Теднә үкрмүдиг кезә чигн бух үзнә: Цугтан туһлна, зуурмар һарсн туһл уга.

¹¹ Теднә бичкдүд хөд мет альвлна, Бичкдүднь нинегәр тогльна,

¹² Кеңкрг болн ятх цокад дуулна, Бүшкүр татад байран кенә.

¹³ Эврәннь өдрмүдән сәнсәәхн давулна. Тедн үклин һазрт амрар күрнә.

¹⁴ Зуг Бурхнд тедн келнә: «Маднас йов цааран, Чини хаалһ медхәр седҗәхшвидн!

¹⁵ Бидн Терүнд церглх – Хамгин Күчтәнь кен болҗахмб? Терүнд мөргснәс юн олз болҗана?»

¹⁶ Болв амулңменднь теднә һарт биш! Хар саната әмтнә селвгәс хол бәәнәв!

¹⁷ Хар саната әмтнә герлнь шулун унтрну, Теднд му бәәдл үзгднү? Бурхн уурлхларн тедниг зовлңд орулну?

¹⁸ Тедн салькнд цокгдад, хагсу өвснлә әдл болхнь, Хүүд цокгдсн буудян хайгла әдл болхнь!

¹⁹ Эс гихлә терүнә көвүдт цааҗ белдсн болхий? Хар саната күн эврән меддгәр терүнд Бурхн икәр күртәтхә.

²⁰ Эврәннь нүдәрн үкл үзтхә, Хамгин Күчтәһин цухлынь медҗ автха!

²¹ Хар саната күүнә җирһлин болзг чилхлә, Үкснә хөөн терүнд өркбүл юмб?

²² Болв Бурхнд медрл сурһхмби? Тер нам Бурхна теңгрин элчнрин зарһ кенә.

²³ Негнь амр цадхлң бәәдлдән, цецгәрҗәх чидлтә цагтан өңгрнә.

²⁴ Терүнә цогцмахмуднь тарһн, Терүнә яснь чимгәр дүүрң.

²⁵ Талдан күн седклин һашудснас өңгрнә, Сән җирһл нам үзлго өңгрнә.

²⁶ Тедн хоюрн һазрт кевтх, Хоюрн өтәр даргдх.

²⁷ Нанд хоран күргхәр бәәх тадна седклиг Болн аалиг медҗәнәв.

²⁸ Келхд: «Нойдын гермүд ода альд? Хар саната әмтнә бәәсн сегмүд альд?»

²⁹ Зуульчлҗ йовх әмтнәс тадн сурсн угавт, Теднә герчлһиг ухалсн угавт?

³⁰ Зовлң ирсн өдрлә хар саната күн харсгдна, Цухлын өдр тер даҗрлһнас сулдхгдна.

³¹ Кен терүнә чирәд йовдлынь үннәр келхмб? Кен терүнә һарһсн тоотынь илдкҗ засглхмб?

³² Терүг тоомсртаһар үкәр тал авч одх, Тер һазртнь харул зогсагдх.

³³ Тиньгр һазр терүнд бул болх, Әмтнь цугтан терүнә ардас йовх, Өмннь йовсн әмтиг тоолҗ болшго олн болх.

³⁴ Тадна хоосн саатуллһн нанд юмб? Тадна келсн үг – мел худл!