Йов 20 - Хальмг келнд орчулсн Әрүн Бичлһс

Цофарин келсн үг

¹ Наамас ирсн Цофар иигҗ хәрү өгнә:

² – Эн учрар мини седклин зовлң Намаг хәрү өгтхә гиҗәнә, Тегәд би үүмәтә бәәнәв.

³ Би һундлта гемшәлһ соңсв – Би ода медсәрн хәрү өгнәв.

⁴ Эклцәснь күүг һазр деер бәәлһснәс нааран чи медвчи:

⁵ Хар саната күүнә җирһлнь агчм, Бурхнд иткдго күүнә байрнь – цаг зуура.

⁶ Теңгрт тер күртхә, Толһаһарн үүл көндәдтхә –

⁷ Бааснлаһан әдл тер мөңкинд уга болх. Терүг урднь үзсн күн келх: «Тер яһла?»

⁸ Зүүдн мет тер нисх, күн олҗ чадшго, Сөөһин үзгдл мет тер билрх.

⁹ Терүг үзҗәсн әмтн дәкҗ харһшго, Төрскн һазрт дәкҗ терүг үзшго.

¹⁰ Терүнә үрд угатя әмтнә өмн сөгдх, Терүнә һарнь зөөринь хәрү түгәҗ өгх.

¹¹ Тегәд баахн наснла әдләр терүнә цогцнь цецгәрв чигн, тер һазрт орх.

¹² Келн дорнь торчах хар санан әмтәхн болҗ терүнд медгдтхә.

¹³ Дегд хәәртәһәр терүгән тер хадһлҗана, Сулдхлго амндан бәрҗәнә –

¹⁴ Терүнә геснднь бәәх тиим хот моһан хорт хүврх.

¹⁵ Зальгсн зөөрәрн бөөлҗх – Бурхн терүнә геснәс зөөринь һарһулх.

¹⁶ Тертн моһан хор көкх, Терүг моһа хатхад алх.

¹⁷ Усна урсхул тер үзшго, Өрмтә болн балта һолмуд, һооҗур үзшго.

¹⁸ Килмҗтәһәр цуглулҗасан эдллго кевтнь хәрү өгх, Орҗах орунь терүг байрлулшго,

¹⁹ Яһад гихлә тер угатя әмтиг даҗрла, дурго болла, Эврән эс бәрсн гермүдиг бийдән авчала,

²⁰ Яһад гихлә терүнә дотркнь хандго бәәҗ, Седвәрнь чилдго бәәҗ.

²¹ Юн чигн юмн терүнә ховдгас алдрдго бәәҗ! Тегәд терүнә бәәхтә бәәдл удандан бәәшго:

²² Даланала болад бәәҗәтл зовлң үзгдх, Нег кемлә тер му бәәдлд тусх.

²³ Терүнә гесн тагяг чикәтә, Болв терүн деер Бурхна цухл буух, Тернь цогцмахмуд деер ик хур асхрсн мет болх.

²⁴ Кемр төмр чашкас зулад гүүхлә, Күрл сумн терүг цумлх.

²⁵ Терүг цумлад, нурһнаснь һарх, Үзүрнь цөсинь хаһлх – Тегәд одҗ тер йоста әәмшг медх!

²⁶ Харңһу таг терүг күләҗәнә, Бөкшго һал терүг зальгх, Шатрт үлдсн тоотынь цугтаһинь шатах.

²⁷ Теңгр терүнә хорта йовдлынь секх, Һазр терүнә өмнәс сөрлт кех.

²⁸ Гертнь бәәх зөөрнь кевтән уга болх, Бурхна цухлын өдрәр тернь усн мет урсх.

²⁹ Бурхнас тиим хөв хар саната күүнд ирх. Бурхна шиидвр терүнд тиим болх!