Йов 2 - Хальмг келнд орчулсн Әрүн Бичлһс

Йовин хойрдгч сөрлт

¹ Бурхна теңгрин элчнр дәкн Деед Эзнә өмн һарч ирцхәнә. Тедн дунд эрлг бас бәәҗ. Терүг Деед Эзнә өмн һарч ирхлә,

² Деед Эзн сурна: – Чи альдас ирвч? Эрлг Деед Эзнд келнә: – Би һазр эргәд зуульчлҗ йовлав.

³ Деед Эзн эрлгәс сурна: – Чи Мини ялч Йовиг үзвчи? Терүнлә әдл күн һазр деер дәкҗ уга. Тер цеврцер, чик седклтә, Бурхнас әәнә, хорта йовдлас зулна. Гем уга терүг алтха гиһәд чи Намаг түкрәд бәәсн бийнь, ода чигн тер цеврцеерәрн бәәһә.

⁴ Эрлг Деед Эзнд келнә: – Арсан өгх! Эврән әмд бәәхин төлә бәәсән кевтнь күн өгх.

⁵ Болв Та һарарн терүнә ясинь, терүнә цогцинь көндәхлә, маһдл уга, тер Тана чирәд Таниг му келх!

⁶ Деед Эзн эрлгт келнә: – Эн кемлә тер чини һарт орҗана, зуг әминь хәәрл.

⁷ Деед Эзнәс салад эрлг йовна. Йовиг тер толһаһаснь көлин тавг күртл өвдкүртә хавдрар дүүргнә.

⁸ Йов өөртә хавдран хусхар, хамхрсн буһшин тасрха авад овалһата үмсн деер сууна.

⁹ Гергнь Йовд келнә: – Чи ода күртл цеврцеерән иткҗ бәнч? Бурхиг му кел – үкхич!

¹⁰ Тернь иигҗ хәрү өгнә: – Чи седкл уга күн кевтә келҗәнәч! Бидн Бурхнас зуг сәәнинь авад, мууһинь авшгой? Тер кевәрн Йов келсн үгдән килнц һарһсн уга.

Йов тал һурвн нәәҗ ирнә

¹¹ Йовин зовлңгин тускар һурвн нәәҗнь соңсад, күн болһн эврәннь бәәсн нутгасн һарад йовцхана: Элипаз Теманас, Билдад Шуахас болн Цофар Наамас. Тедн Йов тал хамдан йовад, терүнә зовлңгинь хувалцад, төвкнүлхин төлә йовцхана.

¹² Йовиг тедн холас үзәд, таньсн уга. Нәәҗнр үзн һашудад уульцхав, хувцан таслҗ шуулад, толһа деерән тоорм цацад, теңгрүр хайцхав.

¹³ Йовиг икәр зовҗах бәәдлинь үзәд, тедн долан өдр, долан сө терүнә хаҗуд һазр деер нег чигн үг келл уга сууцхав.