Йов 19 - Хальмг келнд орчулсн Әрүн Бичлһс

Йовин өгсн хәрү

¹ Йов иигҗ хәрү өгнә:

² – Кедү цагтан намаг зовахмбт, Келсн үгмүдәрн бийим салвлхмбт?

³ Тадн намаг арв дәкҗ му келвт, Догшн бәәдләс ичсн угат.

⁴ Кемр би йосндан төөрсн болхла – Терм нанла үлдх билә.

⁵ Кемр тадн үнндән нанд деерлкчәхлә, Му нертәдм шоодҗахла –

⁶ Медҗ автн: энтн Бурхн нанд хоран күргв, Терүнә гөлм намаг бәрв.

⁷ «Намаг алҗана!» – гиһәд би хәәкрүв, болв хәрү уга. Дөң сурнав, болв харсдгнь уга.

⁸ Бурхн мини хаалһ хаав – йовҗ болшго болв. Мини хаалһиг харңһуһар хаав;

⁹ Күндлһиг нанас холдулв, Мини толһаһас титм шүүрҗ хайв.

¹⁰ Бурхн намаг эргмдән тасҗад авчана – би үкҗәнәв! Нәәлвриг моднла әдләр уңгарнь таслв.

¹¹ Намаг Тер цухларн дәврв, Намаг бийиннь дәәснә тоод орулв.

¹² Хаалһ һарһад Терүнә дәәсн намаг дәврҗәнә, Мини сегд орад ирҗәнә.

¹³ Тер нанас мини ахнрдүүнрим хольҗулв, Таньдг әмтн нанас зулдг болв.

¹⁴ Өөрхн әмтн намаг үлдәв, Таньдг әмтн намаг мартв.

¹⁵ Эврәннь герт бәәлһсн әмтн, зарц күүкд улс намаг талын күүнд тоолҗана. Теднд би күүнә күн болв.

¹⁶ Зарцан дууднав – тер хәрү өгхш, Ода терүг сурҗэрхмн болҗанав.

¹⁷ Мини әмсхләс гергм зулна, төрлсадндан би җигшүртә болҗанав.

¹⁸ Нанд нам бичкн көвүд дурго: Намаг һарч ирхлә – наад бәрнә.

¹⁹ Би өөрхн нәәҗнртән һә болҗанав, Мини дурлҗасн әмтн өмнәсм сөрцхәв.

²⁰ Би арсн ясн хойр болад үлдв, Зуг бүүлм бүрнбүтн.

²¹ Хәәрлтн! Үүрмүд, намаг хәәрлтн, Намаг Бурхна һар цокв!

²² Яһад тадн намаг Бурхнла әдл мөрдҗәнәт, Мини махмудар цадҗахшта?

²³ О, кемр мини үгмүд бичҗ авсмн болхлаг, Тедниг дегтрт бичсмн болхлаг,

²⁴ Хорһлҗн деегүр төмрәр хаһлад, Чолунд мөңкинд үлдәхнь!

²⁵ Болв би меднәв – мини Харсач әмд, Аштнь Тер һазр деер зогсх!

²⁶ Мини цогцин арсн унв чигн, әмм һартл би Бурхиг үзхв.

²⁷ Би эврәннь нүдәр Терүг үзхв, Би эврән – талдан күн биш! Нам мини зүркн цокдган чигн ууртха.

²⁸ Тадн болхла намаг көөлдхәр седҗәнт, Намаг цугтаднь гемшәҗәнт.

²⁹ Тиигхлә селмәс әәтн, Юңгад гихлә догшн йовдл селмәр засглгдмн. Тадн медхит: ик зарһ бәәдмн!