Йов 18 - Хальмг келнд орчулсн Әрүн Бичлһс

Билдадын келсн үг

¹ Шуахас ирсн Билдад иигҗ келв:

² – Тадн кезә күүндлһән чиләхмт? Ухалтн, тегәд хөөннь күүндхмн.

³ Ю хәәҗ бидн малмудла әдлцхмб, Чини нүднд муңхган үзүлхмб?

⁴ Чи уурлхларн седкләрн зовҗанач – Чамас көлтә һазр хоосрхмби? Эс гихлә хад чолун ормасн көндрхмби?

⁵ Хар саната күүнд герл унтрх, Терүнә һалас очн чигн үлдшго.

⁶ Терүнә сегд герл унтрх, Шамнь унтрх.

⁷ Терүнә ишкдл күчән геех, Терүнә седвәрнь бийднь харш болх.

⁸ Терүг көлнь эврән бәрәнд күргнә, Тегәд тустан гөлмд орна.

⁹ Терүнә көлднь бүтү тусх, Терүг хавх бәрх –

¹⁰ Һазр деер терүг нуувчар хавх күләҗәнә, Хаалһднь терүг урх күләҗәнә.

¹¹ Эргмдән әәмшг бүсләд өөрдҗәнә, Мөрәрнь хәәҗ йовна.

¹² Харһнад терүнә чидлнь чилҗәнә, Бүдрхләнь зовлң күләҗәнә.

¹³ Терүнә арсн гемд даргдҗана, Цогцинь арсна гем бәрҗәнә.

¹⁴ Терүг шатрин тогтун бәәдләс чирҗ һарһх. Тегәд Әәмшгин Хан тал авч одх.

¹⁵ Терүнә шатрт талдан күн бәәрлх, Гернь күкрәр булгдх.

¹⁶ Дораснь терүнә уңгнь хагсх. Деерәснь терүнә ацмуд хумхарх.

¹⁷ Терүнә туск тодлвр һазр деерәс биллгдх. Терүнә нериг уульнцд күн тодлшго.

¹⁸ Терүг һазр деерк бәәдләс салһад, Герләс харңһуд көөҗ орулх.

¹⁹ Терүнә бичкдүд чигн, хөөт үйнр чигн, улс дунднь чигн уга болх. Гертнь нег чигн күн әмд үлдш уга.

²⁰ Терүнә тускар барун үзгт соңсхла – чичрәд одцхах, Зүн үзгт соңсхларн – әәһәд одцхах.

²¹ Хар саната әмтнә бәәрнлә тиим болдмн. Бурхиг медшго нутгт тиим болдмн.