Йов 17 - Хальмг келнд орчулсн Әрүн Бичлһс

¹ Мини седкл һундлар дүүрң, Мини өдрмүд чилҗ йовна, Мини үкәр белн күләҗәнә.

² Эргмдән зуг наад бәрлһн, Әмтнә зоогас нүдән аньҗ чадҗанав.

³ Та мини Харсач болтн. Мини төлә бас кен даавр авхмб?

⁴ Та теднә зүркиг тоолврас хаавт, Тегәд Та тедниг деегшән өргшгот.

⁵ Кемр кен чигн мөңг авхар үүрмүдиннь тускар ховлхла, Терүнә бичкдүдин нүднь эцх.

⁶ Әмтн мини чирәд нульмдгар, Тер нанар цугтаннь зог кев.

⁷ Зовлңгас нүдм сохрв, Цогцм сүүдр мет болв.

⁸ Чик седклтә күн энүнәс йир әәмнә, Буру уга күн Бурхнд иткдго улст уурлна.

⁹ Үннч күн хаалһасн хаҗишго, Цевр һартань чидләрн батрх.

¹⁰ Тадн цугтан хәрү наартн, Тадн дунд цецн кү олҗ чадҗанав!

¹¹ Мини җирһл давв, Зүркнәнм күсл болҗасн Мини зурас күцсн уга.

¹² Тедн харңһу сөөг өдрт тоолҗана: «Герл өөрхн гинә», – болв эргмдән харңһу.

¹³ Кемр мини гер – үклин һазр, Харңһуд бийдән кевтр белдхлә,

¹⁴ Орад кевтх үкәрән би эврәннь эцк гиҗ келхлә, Өтиг болхла – экән, эгчән гихлә,

¹⁵ Мини нәәлвр тиигхлә яһсмб? Мини нәәлвриг кен үзсмб?

¹⁶ Үклин һазрин үүднд тер буухий? Нанла хамдан тооснд кевтхий?