Йов 16 - Хальмг келнд орчулсн Әрүн Бичлһс

Йовин өгсн хәрү

¹ Йов иигҗ хәрү өгнә:

² – Тиим юм би олар соңслав. Тадна тогтнулснас зуг зовлң.

³ Хоосн үгд чилгч бәәхий? Чамаг тиигҗ хәрү өгдгәр, юн зоваҗахмб?

⁴ Тадн мини ормд бәәсн болхла, Би бас тиигҗ келх биләв. Тадна өмнәс зогслго келәд бәәх биләв, Дәкәд гемшәһәд толһаһан зәәлх биләв.

⁵ Би тадниг келәрн батлх биләв, Хоосн үгмүдәр эвлх биләв.

⁶ Күүндхлә, мини өвдкүр зогсшго, Болв тагчг бәәхлә – тер баһршго.

⁷ Бурхн мини сүл чидлим авчкв, Дәкәд мини өөрхн әмтиг тарав.

⁸ Тер намаг базһва, Тиим бәәдл мини өмнәс герчнь болв. Дәкәд мини эццн бәәдл герчм болҗана.

⁹ Цухлтдан бәргдәд Тер ууртан бүтҗәнә, Нанд шүдән хәврҗәнә; Дәәсн намаг хәләцәрн цольгҗана.

¹⁰ Тедн нан тал аман аңһаҗана, Тедн җигшүртәһәр халхарм ташҗана. Цугтан нег кемлә намаг дәврҗәнә.

¹¹ Бурхн намаг килнцтә әмтнд бәрүлв, Хар саната әмтнә һарт хайҗ өгв.

¹² Би таварн бәәләв, Тер намаг үүмәнд орулв, Тер күзүнәсм бәрәд сегсрв, Намаг пуган кеһәд зогсав.

¹³ Терүнә сумар хадг әмтн намаг бүслв. Тер хәәрлт угаһар мини бөөриг цумлна. Тер цөсим һазр деер асхна.

¹⁴ Махмудт бүтн орм үлдәсн уга, Намаг күчтә дәәч мет дәврҗәнә.

¹⁵ Би бийдән шүрүн эдәр хувц уйҗ авув, Би маңнаһарн һазрт күрч сөгдв;

¹⁶ Нульмснас мини чирә улаҗана, Нүдим харңһу таг хаав.

¹⁷ Зуг мини һар килнц уга, Мини зальврлһн цевр.

¹⁸ О, һазр! Мини цусиг бичә бултул! Мини хәәкрсн дун бичә тагчгртха!

¹⁹ Болв теңгрт нанд Герч бәәнә, Деерәс намаг Харсдгнь бәәнә.

²⁰ Үүрмүд намаг наад бәрҗәнә, Зуг мини нульмсн Бурхна өмн асхрҗана.

²¹ Хойр күн хоорндан күүндҗәх мет Күүг кен Бурхнта хамднь келҗ шалһх?

²² Тегәд тоота җилмүд давх, Зуг би хәрү эргдго хаалһдан орхв.