Йов 15 - Хальмг келнд орчулсн Әрүн Бичлһс

Хойрдгч күүндвр Элипазин келсн үг

¹ Теманас ирсн Элипаз иигҗ хәрү өгнә:

² – Цецн күн хоосн үгмүдт хәрү өгхий? Гесән тер дорд үзгин халун салькар дүүргхмб?

³ Тус уга күүндвриг, олз уга үгмүдиг бурушахий?

⁴ Чи нам Бурхна әәмшг һазалвч, Чи нам Бурхнас әәдгән уурвч.

⁵ Яһад гихлә эн келнд чамаг чини килнц дасхв, Чи мекллһнә кел дасҗ аввч.

⁶ Чамаг би биш, чини амн бурушаҗана. Чамаг чини келн бәрүлҗәнә.

⁷ Эс гихлә чи әмтнәс түрүңкнь болҗ һарвчи? Эс гихлә уулмудас түрүлҗ орчлңд һарч ирвчи?

⁸ Чи Бурхна селвлцәнд орлчи, Чамд цецн ухан кевтән күртсн болвза?

⁹ Мадна дасад угаһас чи юуһинь дасвч? Мадна медәд угаһас чи юуһинь медвч?

¹⁰ Мадн дунд буурл үстәнь бәәнә, Мадн дунд көгшә бәәнә – Чини эцкәс кесг ах!

¹¹ Бурхнас ирҗәх тогтун бәәдл чамд баһ болҗану, җөөлн үгмүд баһий?

¹² Чини зүркн альдаран дуудҗана, чини нүдн альдаран хәләҗәнә?

¹³ Чини седкл Бурхна өмнәс яһад сөрҗәнә? Чини амнас тиим үгмүд яһад һарчахмби?

¹⁴ Күн цеврцер болҗ чадхий? Күүкд күүнәс һарсн күн үннч болхий?

¹⁵ Хәлә, Бурхн элчнртән иткҗәхш, Нам теңгр Терүнә нүднд чилгр биш болҗ үзгднә.

¹⁶ Тиигхлә күн кемб – җигшүртә болн килнцтә, Ус ууҗаснла әдләр хоран күргнә.

¹⁷ Би чамд цәәлһсүв, чи соңс. Би эврән үзсән чамд келҗ өгсүв.

¹⁸ Цецн әмтнә келснә тускар, Теднә өвкнрәс эс нуугдсна тускар келсв:

¹⁹ һанцхн теднд һазр өггдлә. Тедн дунд талын күн ордго.

²⁰ Килнцтә күн җирһлиннь цуг өдрмүдт зовна, Деермч күн тоота нас наслна.

²¹ Терүнә чикнд әәмшг соңсгдна, Амрчасн цагт терүн тал алач ирнә.

²² Терүнд харңһуһас алдрҗ һарх арһ уга, Терүг удандан үлд күләҗәнә.

²³ Тер – йовц күн, махч шовуна хот. Харңһуһин өдр өөрдсинь тер медҗәнә.

²⁴ Терүг күнд болн түрү бәәдл әәлһнә. Терүг дә эклхәр белдсн хаанла әдләр ээрнә,

²⁵ Юңгад гихлә тер Бурхн тал һаран өргснд, Хамгин Күчтән өмнәс буцснд.

²⁶ Терүнә өмнәс деегүр бәәдләр һарснд, Төмрәр орасн күнд халхцта йовснд.

²⁷ Юңгад гихлә, чирәнь өөкәр дүүрч, Ташань тонтаһад тарһлҗ.

²⁸ Хамхлад тарасн балһсд тер бәәрлҗ бәәх, Әмтнә эҗго гермүдт бәәх, Хамхрад болн нурад унх гермүдт бәәх.

²⁹ Төрүц тер дәкҗ байҗшго, Төрүц көл деерән зогсҗ чадшго, Терүнә эдлахунь һазр деерәһәр делгршго.

³⁰ Харңһуһас тер бултҗ чадшго. Терүнә бүчрмүдиг һал хагсах, Терүнә цецгүдинь салькн таслад хайх.

³¹ Ки нәәлвртән бичә итктхә, Тернь хоосн ицлт болх.

³² Цагаснь өмн тер хумхарх, Терүнә ацмуднь көкрш уга.

³³ Болад уга темсән бүчрлә әдл уңһах, Өңгән тер олив моднла әдл геех –

³⁴ юңгад гихлә Бурхнд иткдго әмтн үрнсадн уга болх. Дәкәд авлһч му авъяста күүнә бәәринь һал авх.

³⁵ Тедн зовлң һарһхар седнә, Хар сана үзүлнә, Зүркнь мекәр дүүрң.