Йов 14 - Хальмг келнд орчулсн Әрүн Бичлһс

¹ Күүкд күүнәс һарсн күүнә җирһлин наснь Ахр болн үүмәһәр дүүрң,

² Цецг мет тер бүчрлнә болн өңгән геенә, Сүүдрлә әдл эрвлзәд, удан бәәхш.

³ Та иим күүнә ардас гетҗәнт? Та нанла зарһцхар седҗәнт?

⁴ Цевр бишәс кен цевр юм һарһҗ чадхмб? Нег чигн тиим күн уга.

⁵ Күн болһна өдрнь тоота, Та терүнд болзгинь заавт – Терүнд давшго меҗәһинь заавт.

⁶ Та терүг хәләдгән уурхнта, Тегәд невчк амртха. Тер эврәннь нег чилсн өдрт нәәмәдлгдсн күн кевтә байрлтха.

⁷ Моднд чигн нәәлвр бәәнә: Терүг чавчсн бийнь – шинәс урһх, тәрәнә шин бүчр һарч ирәд бәәх.

⁸ Терүнә уңгнь көгшрв чигн, тәәрсн модна йозурнь тооснд хумхарв чигн –

⁹ Ус авхларн урһх, Бичкн моднла әдл экләд ацнь өсх.

¹⁰ Зуг күн үкнә, уга болҗ одна. Әмнь һархла тер альдв?

¹¹ Нуурт усн хагсна – Һолын усн татгдх, хагсх.

¹² Тедү мет күн кевтхләрн дәкҗ босшго. Теңгр кевтән уга эс болтл тер сершго, Эврәннь нөөрәс һаршго.

¹³ О, кемр Та намаг үклин һазрт бултулсмн болхнь, Тана цухл давтл бултулсн болхнь, Тегәд намаг санх болзг урдаснь заахит!

¹⁴ Болв үкснә хөөн күн тегәд шинәс әмд бәәхий? Церглтдм сольх күн эс иртл цуг өдрмүдин туршарт би күләнәв.

¹⁵ Та дуудхит, би хәрү өгхв, Тегәд Эврәннь һарин кегдләс Та уйдхит.

¹⁶ Та дәкәд мини ишкдл тоолхит, Болв мини килнц гетдгән уурхит;

¹⁷ Мини буру йовдл кезәңк савд бултулгдх, Тегәд мини гемиг Та биллхит.

¹⁸ Болв уул хамхрна, нурна, Уулын хад ормасн көндрнә.

¹⁹ Усн чолуг эләнә, дүүрәд асхрна, һазрин көрсн урсхулд туугдна. Тиигҗ Та күүнә нәәлвр уга кенәт.

²⁰ Терүг чилгч күртлнь цокад Та диилхит – тер уга болх. Терүнә чирәзүсинь оңдарулхит, Та терүг көөхит.

²¹ Терүнә үрднь тевчгдҗәх угаһинь медхш, Тедниг басгдсн угаһинь тер үзҗәхш.

²² Зуг эврә өвдкүр терүнә цогцинь зоваҗана, Зуг бийиннь бәәдлд терүнә седкл уульҗана.