Йов 13 - Хальмг келнд орчулсн Әрүн Бичлһс

¹ Би терүг цугтаһинь нүдәрн үзләв, Би эврән чикәрн соңслав. Тегәд цугтаһинь би медүв.

² Тадна медсиг би бас меднәв, Би таднас баһар медхшлм.

³ Болв би Хамгин Күчтәлә күүнднәв, Би Бурхнд бурушахар седҗәнәв!

⁴ Та үнниг бултулхар худл келҗәнәт, Тадн цугтан тус уга эмчнр бәәҗт.

⁵ О, кемр тадн ода тагчгрсн болхлаг, Терүнд тадна цецнь медгдх билә!

⁶ Тиигхлә, мини цәәлһсиг соңстн, Мини бурушаҗахиг медҗ автн.

⁷ Бурхнд тадна худл кергтәй? Терүнә төлә тадн худл келхвтә?

⁸ Терүнә төлә тадн дуран медүлхәр седҗәнт? Терүг харсхар седҗәнт?

⁹ Тер тадниг сөрхлә – сән болхий? Эс гихлә, Терүг күн кевтә меклхвт?

¹⁰ Кемр нуувчар седкләрн дуран медүлхәр бәәхләг, Тер тадниг догшар илдкх.

¹¹ Тегәд тадниг Терүнә алдрнь әәлһх, Тадн деер Бурхна әәмшг буух.

¹² Тадна келсн үг үмсн мет тус уга, Тадна халхц элснәс кегдсмн.

¹³ Тегәд тагчкртн, би келнәв, Хөөннь нанла болснь болг.

¹⁴ Би җирһлән хармншгов, Би әәмшгтә бәәдлд орхдан белмб.

¹⁵ Нәәлвр уга, Тер намаг алх. Болв Терүнд зөвтәв гиһәд давтад бәәхв.

¹⁶ Энүнд мини аврлт! Бурхнд иткдго күн болхла, Терүн тал өөрдҗ чадшго.

¹⁷ Соңстн, соңстн мини үгмүд, Мини келҗәснд оньган өгтн!

¹⁸ Би ода эврәннь кергән келҗәнәв, Би тегәд зөвтә болхан медҗәнәв.

¹⁹ Кен намаг зүткҗ диилхмб? Тиигхлә би тагчкрад үкх биләв.

²⁰ О, Хәәрхн! Зуг нанд хойр юм бичә учратн – Тегәд Танас би бултхшв:

²¹ Тана һар нан тал бичә өөрдтхә, Тана әәмшг намаг бичә чичрүлтхә!

²² Намаг дуудтн – би хәрү өгсүв, Эс гиҗ келх зөв өгтн, Эврән хәрүһинь келтн.

²³ Кедү нанд килнц, кедү му йовдл бәәнә? Мини килнцин тускар, мини дутуһин тускар келҗ медүлтн.

²⁴ Нанас Та Эврәннь чирәһән яһад бултулнат, Намаг Эврәннь дәәсн гиҗ санҗант?

²⁵ Та нисәд унсн хамтхасиг әәлһхвт? Та хагссн өвсиг көөлдхвт?

²⁶ Та намаг һашутаһар гемшәнәт, Та баахн цага килнцим сергәнәт.

²⁷ Та мини көлд чөдр тәввт. Мини хаалһиг кевтнь харнат, Мини көлин мөриг шинҗлнәт.

²⁸ Би үмкә юмн кевтә үмкәрнәв, Би гүрмд идгдсн хувцн мет болнав.