Йов 12 - Хальмг келнд орчулсн Әрүн Бичлһс

Йовин өгсн хәрү

¹ Йов иигҗ хәрү өгнә:

² – Зуг тадн олн әмтн болҗахмбт? Цецн таднла хамдан үкхий?

³ Болв нанд таднла әдл бас ухан бәәнә. Би таднас юуһарн чигн му бишв, Тадна келсиг кен эс меднә?

⁴ Би үүрмүдиннь нааднинәдн болв. Зуг би Бурхиг дуудлав, Бурхн нанд хәрү өглә! Болв үннч болн цевр күн күүнә наадн болдмн!

⁵ Бәәхтәнь түрүзүдүг наад бәрнә, Дәәвлсинь түлкнә.

⁶ Деермчнрин сег тогтун, Бурхиг уурлулҗах әмтнд әәмшг уга. Тедниг Бурхн һартан бәрҗәх мет болҗана.

⁷ Тиигхлә малмудас сур – тедн цәәлһх, Теңгрин шовуд чамд келҗ өгх.

⁸ Һазрас медҗ ав – тер цәәлһҗ өгх, Теңгсин заһсд чамд келҗ өгх.

⁹ Деед Эзн тиигҗ тогтасиг Теднәс кень эс меддви?

¹⁰ Терүнә һарт ямаран чигн юмсуд әмд бәәнә Болн кен чигн күүнә әмсхл бәәнә.

¹¹ Үгмүдиг чикн эс йилһнү, Болн келн амт эс амтлну?

¹² Тиигәд көгшд цецн эс болну? Ут наста күн ухата эс болну?

¹³ Бурхнд – цецн ухан чигн, күчн чигн бәәдг; Терүнд – селвг чигн, тоолвр чигн бәәх.

¹⁴ Кемр Тер нурахла – нег чигн күн босхшго, Кемр Тер бәрәд хаахла – хаагдснь һарч чадшго;

¹⁵ Усна урсхул Тер хаахлаг – Эргмдән хагсу болх, Кемр усиг тәвхлә – цугтаһинь һазр деерәс уга кех.

¹⁶ Терүнд чидл чигн, күцәмҗ чигн бәәнә; Терүнә һардврт меклдг күн чигн, меклгдснь чигн бәәнә.

¹⁷ Селвгчнрән Тер көл нүцкәр көөнә. Зарһчнриг һәргин тоод орулна.

¹⁸ Хаадудас Тер бүсинь таслҗ авна, Ташаһинь шуурха кенчрәр боона.

¹⁹ Гелңгүдиг көл нүцкәр көөнә, көлдән батар зогсҗасиг цокад уңһана.

²⁰ Итклтә күүнә келинь бәрнә Болн медәтнрин ухаһинь ширгәнә.

²¹ Нойдыг му нернд орулна Болн күчтә әмтнә бүсинь тәәлнә.

²² Харңһуһин гүүнинь секнә Болн таг харңһуд герл орулна.

²³ Тер келнулсиг негт өөдлүлнә, негт тедниг ална. Тедниг негт тарана, негт тедниг цуглулна.

²⁴ Келнулсин толһачнрин ухаһинь ширгүләд, Хаалһ уга, эҗго һазрт көөнә.

²⁵ Тедн герл угаһар, харңһуд темтрәд йовна, Деед Эзн тедниг согту мет дәәвлүләд йовулна.