Йов 11 - Хальмг келнд орчулсн Әрүн Бичлһс

Цофарин келсн үг

¹ Наама һазрас ирсн Цофар иигҗ хәрү өгнә:

² – Олн үгмүдт хәрү уга болхий, Удандан келҗәхнь зөвтә болхий?

³ Кемр чи үлү үг келҗәхлә, наадкснь тагчг болхий? Кемр чи му келҗәхлә, чамаг ичәдгнь уга болхий?

⁴ Чи чикәр келҗәнәв гиҗ шиидвч, Чи Бурхна өмн цеврв гиҗ келҗәнәч.

⁵ О, кемр Бурхн экләд келсн болхла, Чамд хәрүһинь өгх билә.

⁶ Чамд цецнә нуувчинь Тер секх билә, Чамд терүнә талдан халхинь үзүлх билә. Мед, Бурхн чини зәрм килнциг мартв.

⁷ Бурхна хаасн юмиг секҗ чадхвчи? Хамгин Күчтәг күцц медҗ чадхвчи?

⁸ Теңгрин өндртнь күрч чадхвчи? Үклин һазрас гүн бас юн бәәдгинь яһҗ медхмбч?

⁹ Утарн һазрас юн даву бәәдви, Өргнәрн – теңгсәс?

¹⁰ Кемр Тер ирхлә, түүрмд орулхар Болн зарһ кехәр дуудх – кен Терүг зогсах?

¹¹ Тер худлчнриг меднә: килнц үзхлә, Тер кевтнь терүг үлдәшго.

¹² Зерлг элҗгн герин бәәдлд эс иҗлтл, Терүнәс эрт һәргд ухан оршго.

¹³ Кемр зүркән цеврәр бәрәд, Бурхн тал һаран суңһхла;

¹⁴ Кемр килнцән уга кеһәд, Шатр дотран му йовдл уга бәәхләг –

¹⁵ Тегәд ичлго хәләхич, батар һоодан зогсхич, дәкәд әәшгоч.

¹⁶ Тегәд муульта бәәдлән мартхич, Терүг чи урссн усн мет тодлхич.

¹⁷ Чини җирһл үдин цагин бәәдләс герлтә болх, Тегәд бүрүл цаг өрүһәр сольгдх.

¹⁸ Чи тогтун болхич, яһад гихлә нәәлвр бәәнә; Эргмдән хәләһәд – таварн унтхич.

¹⁹ Амрхар седхлә, күн чамаг әәлһшго; Кесгнь чамд зуһудх.

²⁰ Болв хар саната әмтнә нүднь эцх, Теднә бәәрн уга болх, Теднә цуг нәәлвр – үклин өмнк әмсхл.