Йов 10 - Хальмг келнд орчулсн Әрүн Бичлһс

¹ Җирһләсн җигшәд бәәвүв – Тегәд би һундлан һарһув, Һашудҗ бәәсн зүркән илдкнәв.

² Бурхнд келнәв: Бичә намаг гемшәтн, нанла юңгад ноолдад бәәсән медүлтн.

³ Даҗрач боллһн Танд сәний, Эврәннь һарин кесн тоотыг бурушах, хар саната әмтнә седвәр дөңнсн сәний?

⁴ Тана нүдн – цогцмахмудын нүднлә әдлий, Та эгл әмтнлә әдл хәләдвт?

⁵ Тана өдрмүд – эгл күүнә өдрмүдлә әдлий, Тана җилмүд – йирдән залусин җилмүдлә әдлий?

⁶ Та нанас юңгад гем хәәһәд бәәнәт, нанас килнц олхар седнәт?

⁷ Намаг буру угаг меднәлмт, Намаг Тана һарас кенчн салһҗ чадшго.

⁸ Тана һар намаг үүдәлә, Тана һар намаг шавад келә. Болв ода намаг уга кехәр седҗәнт.

⁹ Тодлтн! Та намаг шаврла әдләр шавлат. Болв ода тооснтоормд хәрү орулҗант?

¹⁰ Та намаг үснлә әдләр эс асхлт, Дарунь ээзгәлә әдләр өткрүлвт?

¹¹ Махар болн арсар ораввт, Ясар болн шүрүсәр батлвт.

¹² Та нанд җирһл болн хәәрлт өгвт, Тана килмҗ мини седкл хадһлв.

¹³ Болв талдан юмн Тана зүркнд хадһлгдҗаҗ. Би меднәв, Та тиигхәр седҗәләт:

¹⁴ Кемр би килнц һарһхла, Та медәд авчкт. Кемр би гем һарһхла, намаг засгллго бәәшгот.

¹⁵ Кемр би бурута болхла – мини зовлң! Кемр би зөвтә болхла – толһаһан өндәх зөв угав: Би му нернәс цадв, Би эврәннь зовлңган үзҗәнәв.

¹⁶ Әрә өндәхлә, арслң аң мет дәврнәт; Намаг дәкндәкн әәлһнәт;

¹⁷ Мини өмнәс шин герчс авч ирнәт, Эврәннь цухлан йир халунар һарһнат. Мел шин дәәсд йовулад бәәнәт.

¹⁸ Намаг Та яһад гесн дотрас һарһвт? Би үкҗ одх биләв, намаг нег чигн күн үзшго билә.

¹⁹ Би нам төрүц уга болх биләв – Би экин геснәс үкәрт орулгдх биләв.

²⁰ Мини өдрмүд удадшго – тегәд үлдәтн, хооран һартн, нам әрвҗән уга байрлт өгтн,

²¹ дәкҗ үзгдшгоһар харңһуһин орнд орхин өмн өргнд тиигтн.

²² Харңһуһин орнд болн үклин таг харңһуд, Тенд бәәрнә бәәдл уга, Герлин ормд таг харңһу.