Йов 1 - Хальмг келнд орчулсн Әрүн Бичлһс

Эклц

¹ Уц гидг һазрт Йов гидг нертә күн бәәҗ. Тер цеврцер болн чик седклтә, Бурхнас әәдг, хамг хар саната йовдлас зулдг бәәҗ.

² Терүнәс долан көвүн, һурвн күүкн һарна.

³ Терүнд 7000 яман болн хөн бәәҗ, 3000 темән, 1000 бух, 500 элҗгн болн тоолҗ болшго олн ялч бәәҗ. Тер күн Дорд үзгин улсас хамгин алдрнь бәәҗ.

⁴ Йовин көвүд эврәннь герт селгәдәр нәр кеһәд, хамдан идәд уутха гиһәд эгчнрән тедн дууддг бәәҗ.

⁵ Кемр нәәрин өдрмүд төгсхлә, Йов тедниг цеврллһнә мөргүлд дууддмн. Өрүн өрлә көвүн болһнаннь төлә Йов тәкл тәкдг бәәҗ. Юңгад гихлә Йов иигҗ келдмн: «Мини көвүд килнц чигн һарһсн болх, зүркндән Бурхиг му келсн чигн болх». Йов тиигҗ оньдин кедг бәәҗ.

Йовин негдгч сөрлт

⁶ Нег дәкҗ Бурхна теңгрин элчнр Деед Эзнә өмн үзгдхәр ирнә. Тедн дунд эрлг бас йовҗ.

⁷ Деед Эзн эрлгәс сурна: – Альдас чи ирвч? Эрлг Деед Эзнд хәрү өгнә: – Би һазр эргәд, зуульчлҗ йовлав.

⁸ Деед Эзн эрлгәс сурна: – Чи мини зарц Йовиг үзсн болвзач? Терүнлә әдл күн һазр деер мел уга, цеврцер, чик седклтә, Бурхнас әәнә, хорта юмнас зулна.

⁹ Эрлг Деед Эзнд келнә: – Йов Бурхиг хара тевчдг болхий?

¹⁰ Та терүг болн терүнә өркбүлиг, терүнә эдлахуг эргмднь халхлвт эсий? Та терүнә күчкөлсинь йөрәвт, ода терүнә малмуднь һазр дүүргәд өсәд йовна.

¹¹ Болв Та һарарн терүнә эдлахуһинь көндәхлә, маһдл уга, тер Тана чирә хәләҗәһәд, Таниг му келх.

¹² Тиигхлә Деед Эзн эрлгд келнә: – Оданас авн терүнә эдлаху цугтан чини һарт орҗана, зуг терүг бичә көндә. Тегәд эрлг Деед Эзнәс салад йовна.

¹³ Нег өдр Йовин көвүд болн күүкд ахиннь герт хурад хот идәд, чаһр ууна.

¹⁴ Генткн Йов тал зәңгч ирәд келнә:

¹⁵ – Чини цармудар һазр хаһлҗала, хаҗуднь элҗгнс идшлҗәлә. Генткн Шебә гидг һазрин деермчнр дәврәд, тедниг көөһәд авад йовҗ одв, чини ялчнриг үлдәр чавчад хайчкв. Би чамд зәңг өгхәр һанцарн әмд үлдв.

¹⁶ Терүнд тиим зәңг келтл, талдан зәңгч ирәд иигҗ келнә: – Теңгрәс Бурхна һал унад, хөөдиг болн ялчнриг шатаһад алчкв. Би чамд зәңг өгхин төлә һанцарн әмд үлдв.

¹⁷ Терүг келәд чиләтл, бас нег зәңгч ирәд иигҗ келнә: – Һурвн үзгәс халдеймүд дәврв, тедн темәд көөһәд авад йовҗ одв. Чини көдләчнриг үлдәр чавчад хайчкв. Чамд зәңг күргхин төлә, би һанцарн әмд һарв.

¹⁸ Тиигҗ терүг келм цацу, бас нег зәңгч ирәд келнә: – Чини көвүд болн күүкд ахиннь герт хот идәд, чаһр уулдв.

¹⁹ Генткн аюлта салькн көдә һазрас көдләд герин дөрвн эрсинь нурачкв. Гер чини үрд деер унв, тедн үкҗ одв. Би чамд зәңг өгхәр һанцарн әмд үлдв.

²⁰ Йов босад, деерк хувцан татад шуулна, үсән хәәчләд, һазр деер түргүл унад, Бурхнд мөргнә.

²¹ Тер иигҗ келнә: – Экиннь геснәс нүцкәр һарлав, нүцкәр эн орнас йовхув. Деед Эзн өглә, Деед Эзн авв: Деед Эзнә нерн тууртха!

²² Тер кевәрн Йов килнц һарһсн уга, Бурхна нериг му келсн уга.