Йона 4 - Хальмг келнд орчулсн Әрүн Бичлһс

Йонан цухл болн Бурхна өршәлт

¹ Болв Йонан хәләцәр эннь ик зовлңта юмн болв: тер уурлад, һундад өөлнә.

² Деед Эзнд иигҗ тер зальврдг болв: – Деед Эзн! Төрскн һазртан бәәхдән иим юмн болх гиҗ би келләлм. Эн учр деерәс оратад уга деерән, Таршиш тал гүүҗ зулхар шиидләв. Би медләв, Та – Бурхн цаһан саната, өр-өвч, удан тесвртә болн хәәрлтәр байн төләдән теднд аюл илгәхәр седҗәхшит.

³ Болв тегәд, Деед Эзн, мини әм авчктн: әмд бәәсн дорхнь, үксн деер.

⁴ – Чи икәр һундвч? – гиҗ Деед Эзн сурв.

⁵ Йона Ниневес һарад, балһсна дорд үзгт бәәрлнә. Тенд бийдән сег бәрәд, терүнә сүүдрт бәәһәд, цааранднь балһснла яахинь шинҗлҗ хәләв.

⁶ Деед Эзн даңһрг гидг урһмл урһаҗ, болв тернь Йонан толһа тус өндртән урһад, һаң халунас халхлдг болв. Йона эн урһсн даңһргт дегд байрлв.

⁷ Дарук өдрт өрүн өрлә Бурхн өт илгәнә. Өтн даңһргин уңгинь малтад хазна, тернь үрҗ одна.

⁸ Нарн һархла, Бурхн дорд үзгин хүүвә сальк илгәнә. Нарн Йонан толһа икәр халулв. Дегд муурад, Йона үклин тускар ухална: – Әмд бәәсн дорхнь, үксн деер.

⁹ – Даңһргас көлтә икәр һундвч? – гиҗ Деед Эзн Йонас сурна. – Э, йир икәр, – гиҗ тер хәрү өгнә. – Үкн үктлән һундлта бәәнәв!

¹⁰ – Чамд даңһрг харм болҗану? – гиҗ Деед Эзн келв. – Чи эврәннь күч-көлсән һарһсн угач, терүг урһасн угач: нег сөөһәр тер һарад, нег сөөһәр үрҗ одв.

¹¹ Тегәд Ниневе ик балһсн Нанд юңгад харм эс болхмб? Терүнд – барун зүн хойран йилһҗ чаддго зун хөрн миңһнәс даву күн болн олн мал бәәнә.