Йона 3 - Хальмг келнд орчулсн Әрүн Бичлһс

Йона Ниневед

¹ Болв Деед Эзн дәкн Йонад келнә:

² – Хаалһд һарч йов! Ниневе гидг ик балһснур од. Теднә бәәрн әмтнд мини келсиг күргәд зәңгл.

³ Йона һарад йовв: Деед Эзнә заасар Ниневе тал одв. Ниневе Бурхна ик гидг балһсн бәәҗ: нег захаснь талдан зах күртл – һурвн өдрин йовдл.

⁴ «Дөчн хонг болад, Ниневе балһсн нурад, уга болх», – гиҗ Йона нег өдртән балһсн дотр йовх болзгар йовад, зәңг тархав.

⁵ Ниневен улс Бурхнд иткнә. Ик бичкн уга, эдн цугтан ямана ноосар нексн шүрүн эдәр уйсн хувц өмсәд, мацг өдрмүд эклҗәхиг зәңглсмн.

⁶ Ниневен хаанд тер зәңг күрхлә, хан ширәһәсн босад, хаана шишлң деерк хувцан тәәләд, шүрүн эдәр уйсн хувц өмсәд, үмсн дотр сууһад,

⁷ тегәд хаана болн түүнә селвгчнрин нерн деерәс балһсн дотр иим заквр олнд зәңглҗ медүлтхә гив: «Әмтн болн аң-адусд хот-хол идшго, ус уушго болн малан идшлдг һазрт һарһшго болҗана.

⁸ Цуг әмтн болн аң-адусд шүрүтә эдәр бийән хучад, болв әмтн чидлән әрвллго Бурхндан зальврад мөргтхә! Күн болһн хар саната, килнцтә йовдл болн күч үзүллһ һарһхан ууртха!

⁹ Кен медлә? Бурхн талданар ухалад, цухлдган уурад, бидн үкхн угавидн болвза».

¹⁰ Тедн хар саната, хорта йовдл һарһдган уурсинь, Бурхн әмтнә кесн йовдлар үзҗ медв. Тиигхлә Бурхн урднь ухалсан соляд – теднд белдсн ик зовлңта бәәдл, аюл илгәсн уга.