Йона 2 - Хальмг келнд орчулсн Әрүн Бичлһс

Йонан зальврлһн

¹ Деед Эзн теңгсин ик заһсиг, Йонаг зальгтха гиһәд, илгәнә. Һурвн өдр болн һурвн сө Йона заһсна гесн дотр бәәв.

² Заһсна гесн дотр тер Деед Эзнд, эврәннь Бурхндан, зальврна:

³ «Аюлла би Деед Эзиг дуудлав – тегәд Тер нанд хәрү өгв, үклин һазрас би хәәкрләв – Та намаг соңсвт!

⁴ Теңгсин гүн йоралднь Та намаг оруллат, намаг урсхул татад авчана; цуг Тана ик дольгас мини деегүр йовҗ йовна.

⁵ Тегәд мини ухалсар: Тана нүднд үзгдшгоһар би көөгдләв. Болв Тана әрүн Сүмитн би дәкәд үзхүв!

⁶ Усн хоолдм күрв, эргнд – теңгсин йорал, толһадм теңгсин урһмл наалдв.

⁷ Һазр дор, уулын уңгднь би күрүв, һазрин өргн үүдн мини ардас мөңкинд хаагдҗ одв! Болв Та намаг үкәрәс татҗ аввт, О, Деед Эзн, мини Бурхн!

⁸ Көшч муурхларн, арһан бархларн би Деед Эзиг санув, тегәд мини зальврлһн Танд күрч, Тана Әрүн Сүмд.

⁹ Тус уга шүтә күндлснь Бурхнас авч болх өршәлһнәс хаһцв.

¹⁰ Би болхла, бәрцән ханлтын бүлән үгәр Танд күргнәв, келсн андһаран күцәнәв. Аврлт Деед Эзнә һарт!»

¹¹ Тиигәд Деед Эзнә закврар заһсн Йонаг хүүрә һазрт бөөлҗәд һарһв.