Йона 1 - Хальмг келнд орчулсн Әрүн Бичлһс

Йона Деед Эзнәс зулҗана

¹ Деед Эзн Амиттаян көвүн Йонад келнә:

² – Хаалһд һарч йов! Ниневе гидг ик балһснур од. Тенд бәәсн әмтиг илдкәд, теднә хар саната йовдлын тускар Намаг меднә гиҗ цугтаднь күргәд зәңгл.

³ Зуг Йона Деед Эзнәс һарч зулхар шиидәд, Таршиш балһснур йовна. Яфа гидг балһснд тер күрәд, керм олҗ авад, мөңгинь өгәд, теңсчнрлә хамдан сууһад, Деед Эзнәс күрх балһснур йовна.

⁴ Болв Деед Эзн теңгст ик сальк көөһәд, догшн һалв сальк көдлгв. Керм хамхрхдан күрв.

⁵ Теңгсчнр әәцхәв. Күн болһн эврәннь бурхндан мөргәд, әмән аврхиг сурҗ зальврцхав. Кермиг гииглүрхәр, күнд ацаһинь теңгст хайна. Йона болхла, керм дотр орад, тенд кевтәд унтҗ одна.

⁶ Кермин ахлач терүн тал өөрдәд келнә: – Юңгад унтад кевтнәч? Бос, эврәннь Бурхан дууд! Тер мана тускар санхмн болвза, тиигхлә бидн үкхн угавидн.

⁷ Теңгсчнр нег-негндән келцхәв: – Кенәс көлтә мадн эн аюлла харһҗанавидн? Энүг илдкҗ медхин төлә, җирв хайх кергтә! Җирв хайцхав – болв эн җирв Йонад тусна.

⁸ – Чамас көлтә мадн эн аюлла харһҗахла, маднд келҗ өг, чи кембч? – гиҗ тедн терүнәс сурцхав. – Ю кедвч? Альдас йовҗ йовнач? Төрскн һазрчн альдв? Ямаран келн-улсин күмбч?

⁹ – Би еврейв, – гиҗ тер келв. – Би теңгс болн хүүрә һазр тогтасн Теңгрин Бурхиг, Деед Эзиг күндлнәв.

¹⁰ Деед Эзнәс зулҗ йовхан келҗ өгхлә, теңгсчнриг ик әәмшг авлв. – Ю һарһснчн энви! – гиҗ тедн келцхәв.

¹¹ Һалв салькн улм чаңһрад бәәсн учрар, тедн Йонас сурцхав: – Теңгс тогтнҗ уурулхин төлә, чамла ю кехмб?

¹² – Эргндк теңгс тогтнтха гиһәд, намаг өргәд, теңгст хайчктн, – гиҗ тер хәрү өгв. Нанас көлтә тиим ик һалв салькн тадниг дәврсиг би меднәлм.

¹³ Теңгсчнр усна көвә тал эклҗ хәәвдәд темцв, зуг арһ уга болад бәәв: һалв салькн улм догшрад ирв.

¹⁴ Тиигхлә тедн Деед Эзиг дуудна: – Деед Эзн! – гиҗ тедн келнә. – Эн күүнә үкләс көлтә мадниг бичә засгла харһул! Буру уга күүнә цус һарһснд бичә шоод! Та – Деед Эзн: Тана седвәр тиим билә.

¹⁵ Тедн Йонаг теңгст хайна – тиигхлә теңгс деер дольгаллһн тогтнҗ одна.

¹⁶ Теңгсчнр Деед Эзнәс икәр әәцхәв. Деед Эзнд тедн бәрц бәрәд, андһаран өгнә.