Йохан 6 - Хальмг келнд орчулсн Әрүн Бичлһс

Тавн миңһн кү цадхлһн

¹ Энүнә хөөн Исус Һалилья (талданар келхд, Тиберәд) нуурин телтр көвә тал һарад йовв.

² Терүнә ардас кесг әмтн дахҗ йовцхав, тер юңгад гихлә, гемтә әмтиг эдгәҗ, ямаран өвәрц юм Исус кесинь тедн үзлә.

³ Исус уул деер һарад, тенд сурһульчнртаһан суув.

⁴ Еврей әмтнә Песах гидг нәр өөрдҗ йовла.

⁵ Исус эргндән хәләһәд, кесг әмтиг аашсинь үзәд, Пилипд келв: – Эн әмтиг цадххин төлә альдас тиим дала өдмг хулдҗ авхмб?

⁶ Исус Пилипиг яһна гилч гиҗ сурв, бийнь болхла эврән ю кехән медҗәлә.

⁷ – Күн болһнд бичкн өдмгин тасрха өгхин төлә маднд бүкл сардан көдләд мөңг шиңгәх кергтә, – гиҗ Пилип хәрү өгв.

⁸ Талдан нег Андрей гидг нертә сурһульч, Шимон Пётрин дү:

⁹ – Энд тавн ичмән өдмгтә болн хойрхн заһста нег көвүн бәәнә. Зуг цуг эн тиим олн күүнд дегд бичкн хот болҗана, – гиҗ Исуст келв.

¹⁰ – Цуг әмтиг суулһ, – гиҗ Исус келв. Теднә бәәсн һазрт дала ноһан бәәҗ, әмтн тер ноһан деер сууцхав. Тооһарн тедн тавн миңһн бәәҗ.

¹¹ Тегәд Исус өдмг авад, Бурхиг магтад, тер өдмгиг хуһлад, суусн әмтнд хуваһад өгв. Тиим кевәр Тер заһсиг бас хуваһад, әмтнд түгәҗ өгв.

¹² Әмтн хотан идәд цадсн хөөн Исус: – Цуг үлдсн хотыг үрәшгоһар цуглулҗ автн, – гиҗ сурһульчнртан келв.

¹³ Әмтн экләд хотан идсн цагт тавхн ичмән өдмг бәәҗ, зуг сурһульчнр хотын үлдл цуглулхла, тернь хулсар гүрсн арвн хойр савд багтв.

¹⁴ – Эн күн орчлңд ирх Әәлдәч, – гиҗ әмтн Исусин кесн өвәрциг үзснә хөөн келв.

¹⁵ Исус әмтиг цуглрад, Терүг авад хаана ширәд суулһхар седҗәхинь медәд, һанцарн үлдхәр уул темцҗ һарад йовҗ одв.

Исус усн деегүр йовҗана

¹⁶ Асхн болхла, Терүнә сурһульчнр уулас нур тал бууһад йовцхав.

¹⁷ Тедн оңһц дотр орад, нур һатлад, Капернам гидг балһснур йовцхав. Харңһурсн цаг билә, зуг Исус хәрү ирсн уга.

¹⁸ Ик салькнас көлтә нуурин дольган буслад, деврәд, усн ормасн һарн гив.

¹⁹ Тавн-зурһан дуунад сурһульчнр оңһцар усч йовхла, генткн нуурин усн деегүр Исусиг теднә оңһц тал йовҗ йовхинь үзв, тедн дегд икәр әәцхәв.

²⁰ – Энтн бив. Бичә әәтн, – гиҗ Исус теднд келв.

²¹ Тедн Исусиг оңһц дотр орулхар седхлә, оңһц тер алднд дарунь кергтә усна көвәд ирәд зогсв.

Исус – әмн-җирһлин хот

²² Маңһдуртнь нуурин телтр көвәд цуглрсн әмтн негхн оңһц бәәсинь үзв. Исусиг оңһц дотр эс орсинь, сурһульчнр Терүн угаһар йовсинь әмтн медв.

²³ Талдан оңһцс Тиберәдәс нег һазрур ирв. Тер һазрт урднь Исус Бурхиг магтҗ, өдмг әмтнд өгәд цадхасн билә.

²⁴ Исусиг болн терүнә сурһульчнриг тенд олҗ чадлго тедн оңһцсд сууһад Исусиг хәәһәд, Капернам балһснур темцҗ йовцхав.

²⁵ Нуурин телтр көвәд Исусиг олҗ авад тедн: – Багш, Та кезә нааран ирвт? – гиҗ сурцхав.

²⁶ – Тадн онц темдг үзсн төләд намаг хәәҗәхшит, зуг өдмг идҗ цадсндан хәәҗәнәт гиҗ Би үнәр келҗәнәв.

²⁷ Дарунь үрҗ оддг хотын төлә бичә көдләд бәәтн, зуг төрүц үрдго мөңк җирһл өгдг хотын төлә көдлҗ бәәтн. Эн хотыг Күмни Көвүн таднд өгчәнә. Яһад гихлә, Тер Бурхн Эцкин онц темдгтә, – гиҗ Исус хәрүднь келв.

²⁸ – Бурхна керг-үүлмүд күцәхин төлә бидн ю кех зөвтәвидн? – гиҗ тедн сурцхав.

²⁹ – Бурхна керг-үүл күцәх гиснь – Бурхна илгәсн күүнд иткх гисн үг, – гиҗ Исус хәрү өгв.

³⁰ – Мадниг Танд итктхә гиһәд Та ямаран өвәрц юм үзүлҗ чадхвт? Терүг үзәд бидн иткх биләвидн. Ямаран кергиг күцәхвт? – гиҗ әмтн хәрүднь сурцхав.

³¹ – Мана өвк-эцкнр көдә һазрт «манна» гидг хот иддг бәәсмн. Энүнә тускар Бурхна Бичгт иигҗ бичәтә: «Идх өдмг Бурхн теднд теңгрәс өглә», – гицхәв.

³² – Моше биш Мини Эцкм таднд йосн өдмг теңгрәс белглҗәнә.

³³ Эн Бурхна өдмг теңгрәс бууҗ ирәд, күмн әмтнд җирһл өгнә, – гиҗ Исус әмтнд келв.

³⁴ – Деед Эзн! Эн өдмгиг маднд оньдиндан өгч белглич! – гиҗ тедн келцхәв.

³⁵ – Би әмн җирһлин өдмгв. Нан тал ирсн күн төрүц өлсш уга. Нанд иткҗәх күн төрүц ундасш уга.

³⁶ Зуг Би таднд урднь келләв: Тадн Намаг үзв чигн иткшгот!

³⁷ Болв Эцкинм өгсн улс Нан тал цугтан ирх. Ирҗәх күүг Би төрүц көөш угав.

³⁸ Юңгад гихлә, Эврәннь күсл күцәхәр биш Бийм илгәсн Эцкин күсл күцәхәр Би теңгрәс бууҗ ирләв.

³⁹ Намаг илгәсн Эцкин күсл иим: Нанд даалһсн әмтиг нег чигн кү геелго цугинь сүл өдрт әмдрүлхв.

⁴⁰ Мини Эцкин күсл эн: Бурхна Көвүг үздг, Терүнд иткдг күн болһн мөңк җирһлтә болх зөвтә. Сүл өдрт Би тедниг әмдрүлхв.

⁴¹ Терүг: Би теңгрәс буусн өдмг гисинь соңсад, евреймүд Исуст дурго болад һундлан келсмн.

⁴² – Эн Йосипин көвүн Исус биший? Бидн энүнә эк-эцкинь меднәвидн, тиим эсий? Ода юңгад эн теңгрәс бууҗ ирв гиһәд бәәдмб? – гиҗ тедн келцхәв.

⁴³ – Бичә һундл өргтн, – гиҗ Исус келв.

⁴⁴ – Намаг илгәсн Эцк угаһар, Нег чигн күн Нан тал ирҗ чадшго. Сүл өдрт Би тер күүг әмдрүлхв.

⁴⁵ Бурхн күн болһниг дасхх гиҗ әәлдәчнр бичҗ. Эцким соңсад, Терүнә ном авч дассн күн Нан тал ирнә.

⁴⁶ Эцкиг күн үзв гиҗ би келҗәхшв. Бурхнас ирсн Һанцхн Тер Эцкиг үзсн мөн.

⁴⁷ Иткдг күн мөңк җирһл эдлнә.

⁴⁸ Би – әмн-җирһлин өдмгв.

⁴⁹ Тана өвк экцнр көдәд «манна» гидг хот идсн бийнь цуһар өңгрҗ одла.

⁵⁰ Теңгрәс ирсн өдмг онц йилһрнә. Энүг эдлсн күн төрүц үкш уга.

⁵¹ Би теңгрәс ирсн әмд өдмгв. Эн өдмгиг эдлсн күн мөңк җирһлтә болх. Эн өдмг – Мини цогц-махмуд. Эн махмудан Би орчлңгин әмн җирһлин төлә өгхв.

⁵² – Эврәннь махмудан идтхә гиҗ маднд тер яһҗ өгхмб? – гиҗ евреймүд заагт зүтклдән болв.

⁵³ – Үнәр келҗәнәв. Кемр тадн Күмни Көвүнә махмудынь эс эдлхлә, Терүнә цусинь эс уухла, бий дотран әмн җирһл уга бәәхит.

⁵⁴ Махмудм эдлсн күн, цусим уусн күн мөңк җирһлтә болна. Сүл өдрт Би терүг әмдрүлхв.

⁵⁵ Юңгад гихлә, цогц бийим – йосн хот. Мини цусм – йосн ундн.

⁵⁶ Мини цогц бийиг эдлдгнь, Мини цусиг уудгнь Нанла негдәд бәәнә. Би терүнлә негдәд бәәнәв.

⁵⁷ Би әм өгчәх Эцкин илгәсн күмб. Тер Нанд җирһл өгчәнә. Цогц бийим эдлҗәх күүнд Би тиигҗ җирһл өгхв.

⁵⁸ Эн теңгрәс бууҗ ирсн өдмг мөн. Эн тана эцкнр идсн манна гидг хот биш. Тедн идсн бийнь өңгрҗ одла. Зуг эн өдмг эдлҗәх күн мөңкиндән бәәх, – гиҗ Исус теднд цәәлһҗ келв.

⁵⁹ Исус Капернам хотнд евреймүдин хурлд әмтиг сурһҗасн цагт келсмн.

Мөңк җирһлин туск үг

⁶⁰ – Эн ном дегд кецү. Кен энүг соңсҗ чадхмб? – гиһәд Исусиг соңссн әмтнә кесгнь келцхәв.

⁶¹ – Эн ном таднд харш болҗану? – гиҗ Исус сурһульчнриг хәрүцҗәхинь медәд келв.

⁶² – Күмни Көвүг урднь бәәсн орн-нутгурнь хәрү өөд болҗ ниссинь үзәд тадн ю келхмт?

⁶³ Бурхна Сәкүсн әм өгнә, күүнә чидл олз өгхш. Мини келсн үг әм җирһл өгдг Сәкүсәр дүүргнә.

⁶⁴ Зуг тадна зәрмнь иткҗәхш. (Исус Терүнд эс иткх болн хөөтндән урвх күүнә тускар урдаснь медлә.)

⁶⁵ Кемр Эцкм күүнд зая эс хәәрлсн болхла, тер Нанур ирҗ чадшго. Терүнә тускар Би таднд келләв, – гиҗ цааранднь Исус келв.

⁶⁶ Эн үгмүдин хөөн сурһульчнрас кесгнь Терүг үлдәһәд хәрү йовҗ одв, дәкҗ тедн Исусиг дахсн уга.

⁶⁷ – Тадн Намаг бас үлдәх санатавт? – гиҗ Исус арвн хойр сурһульчнрасн сурв.

⁶⁸ – Деед Эзн минь, бидн кен тал йовхмб? Мөңк җирһл өгдг үгмүд Танд бәәнә.

⁶⁹ Та Бурхнас ирсин гидгиг бидн медҗ иткләвидн, – гиҗ Шимон Пётр хәрү өгв.

⁷⁰ – Тадниг, арвн хойр кү Би йилһҗ эс авлу? Зуг тадна заагас негнтн – эрлг! – гиҗ Исус келв.

⁷¹ Тер Шимон Йуда Искериотин тускар келҗ. Тер арвн хойрин негнь болсн бийнь, зуг хөөннь Исусас урвҗ.