Йохан 20 - Хальмг келнд орчулсн Әрүн Бичлһс

Исусин әмдрлһн

¹ Өр цәәтл шин долан хонгин түрүңк өдр эклхин өмн Магдален хотна Марий харңһуһар үкәр тал йовна. Өөрдәд ирхләнь, үкәр хаасн хад чолун тедүкнд кевтсинь үзв. Үкәрнь секәтә бәәҗ.

² Тер Симона Пётрүр болн Исусин дурта сурһульч тал гүүҗ ирәд: – Тедн Деед Эзиг үкәрәснь һарһад авад йовҗ оч, цогцинь альд орксинь бидн медҗәхшвидн! – гиҗ келв.

³ Пётр тер сурһульчта хамдан тер дарунь үкәрүр йовцхав.

⁴ Тедн хоюрн гүүҗ. Зуг тер сурһульч Пётриг күцәд үкәрүр түрүләд гүүҗ ирв.

⁵ Үкәр дотр шаһаҗ хәләһәд, тенд Исусиг орасн оршалһна кенчр үзв. Зуг сурһульч үкәр дотр орсн уга.

⁶ Дәкәд терүнә ард йовсн Симон Пётр гүүҗ ирәд, үкәр дотр орв. Исусин цогциг орасн кенчр

⁷ болн толһаһинь боосн альчур бас үзв. Тер альчур наадк кенчрмүдәс талдан ормд эвкәд тәвгдсн бәәҗ.

⁸ Тиигхлә түрүләд үкәрүр гүүҗ ирсн наадк сурһульч бас үкәр дотр орв. Тер үзәд иткв.

⁹ Бурхна Бичгәр Исусиг әмдрхинь тедн ода чигн медәд уга бәәҗ.

¹⁰ Сурһульчнр герүрн хәрв.

Магдален хотна Марий Исус хойр

^11-12 Марий үкәрин өөр ууляд зогсв. Уульн бәәҗ тер үкәр дотр шаһаҗ хәләв. Генткн цаһан хувцта хойр Бурхна элчнриг тер үзв. Тедн Исусин цогц кевтсн ормд сууҗ, негнь толһаднь, дарукнь көлднь.

¹³ Бурхна элчнр Марийас: – Күүкн, чи юңгад уульҗахмч? – гиҗ сурв. – Тедн мини Деед Эзиг авад йовҗ одв. Болв Терүг альд тәвсинь би медҗәхшв, – гиҗ тер хәрү өгв.

¹⁴ Күүкд күн хәрү эргәд хәләв, генткн тенд Исусиг үзв. Зуг Исусиг Бийнь зогсҗахинь тер йосндан таньҗ медҗ чадсн уга.

¹⁵ – Күүкн, юңгад уульҗахмч, кениг хәәҗәхмч? – гиҗ Исус келв. Марий Исусиг сад хәләдг күн гиҗ санад келв: – Эзн минь, кемр Чи Исусиг авад йовҗ одсн болхла, цогцинь альд тәвсән кел, би йовад авнав.

¹⁶ – Мирьям, – гиҗ Исус терүнд келв. Күүкд күн Терүнүр эргҗ хәләһәд, еврей келәр: – Раввуни! (Багш гидг үг), – гиҗ хәәкрв.

¹⁷ – Дәкҗ Нанур һаран бичә күрг! Би Эцкүрн деегшән һарад угав. Мини дүүнр тал йовад кел: Би эврәннь Эцкүр болн тадна Эцкүр хәрҗәнәв, Мини Бурхн тал, тадна Бурхн тал, – гиҗ Исус келв.

¹⁸ Магдален хотна Мирьям сурһульчнр тал йовад: – Би Деед Эзиг үзв! – гиҗ келв. Исусин келсн үгмүдиг теднд тер келҗ өгв.

Сурһульчнр әмдрсн Исусла харһҗана

¹⁹ Асхн долан хонгин түрүңк өдртнь сурһульчнр цуглрсмн. Тедн евреймүдин толһачнрас әәһәд, үүдән төдглҗ. Үүднь төдгтә бәәсн бийнь Исус ирәд: – Бурхн тадниг өршәтхә! – гиҗ келәд,

²⁰ Сурһульчнртан эврәннь хойр һаран, хәврһән үзүлв. Тедн цуһар Деед Эзиг үзәд, икәр байрлцхав.

²¹ – Бурхн тадниг өршәтхә! Эцкм Намаг илгәсн кевәр Би тадниг илгәҗәнәв, – гиҗ Исус келәд,

²² тедн тал үләһәд, келв: – Әрүн Сәкүсиг автн, – гив.

²³ – Кемр тадн күүнә килнц тәвҗ өгхлә, Бурхн терүнә килнц тәвҗ өгх. Болв кемр тадн күүнә килнцинь эс тәвҗ өгхлә, Бурхн терүнә килнц тәвҗ өгшго, – гиҗ Исус келв.

Исус Томас хойр

²⁴ Исусиг ирсн цагт Икрин өрәсн Томас, арвн хойр сурһульчнрин негнь уга бәәҗ.

²⁵ – Бидн Деед Эзиг үзләвидн! – гиҗ талдан сурһульчнр терүнд келв. – Хадасн орсн ормиг һартнь үзәд эс көндәтл болв хәврһднь бәәсн шавинь эс көндәтл би төрүц иткшгов, – гиҗ Томас хәрү өгв.

²⁶ Долан хонг давсна хөөн сурһульчнр саак кевәрн нег герт цуглрв. Тер цагт Томас бас теднлә бәәв. Үүдн төдгтә бәәлә, зуг Исус дәкн үзгдәд, сурһульчнрин дунд зогсад: – Бурхн тадниг өршәтхә! – гиҗ келв.

²⁷ – Эврәннь хурһан өг нааран, Мини һар хәлә. Һаран өгәд Мини хәврһм көндә. Маһдл уга итк! – гиҗ Исус Томаст келв.

²⁸ Томас: – Деед Эзн минь болн мини Бурхн! – гиҗ хәрү өгв.

²⁹ Исус: – Чи Намаг үзәд итквч. Намаг үзлго иткдг күн буйн-кишгтә! – гив.

Эн дегтрин тускар

³⁰ Кесг өвәрц темдг Исус сурһульчнртан үзүлв. Теднә тускар эн дегтрт бичгдсн уга.

³¹ Исус Бурхна илгәсн Аврач Бурхна Көвүн гиҗ иткүлхин төлә, болв иткәд Терүнә нернә төләд мөңк җирһл эдлҗ бәәтхә гиҗ эн дегтр бичгдсн бәәҗ.