Йохан 17 - Хальмг келнд орчулсн Әрүн Бичлһс

Исусин зальврлһн

¹ Үгән төгсәһәд, Исус толһаһан өргәд, теңгр хәләһәд: – Аав минь! Цаг ирв. Көвүн Таниг туурулхин төлә Көвүг туурул.

² Та цуг күмн әмтиг залх йос Терүнд өгвт. Тер учрар Көвүнтн Тана даалһсн әмтнд мөңк җирһл өгх. Тер зөвиг Та Эврән Терүнд өгвт.

³ Мөңк җирһл гиснь: Таниг ор һанцхн Бурхиг болн Тана илгәсн Исус Христосиг медҗ авлһн.

⁴ Би Таниг эн һазрт туурулв. Тана даалһсн көдлмшиг күцәвүв.

^5-6 Ода Аав минь! Орчлң үүдәд тана һарар бүтәгдснә өмн Би Танла хамдан алдр нернд орсн биләв. Дәкн намаг тер бәәдлд орулыт. Нарт делкәһәс авад, Нанд өгсн Тана даалһсн алдр неритн әмтнд секв. Эн әмтн Тана. Та эдниг Нанд өгвт. Эдн Тана үгиг зүркндән хадһлв.

⁷ Нанд өггдсн цугинь Танас һарчахинь эдн ода меднә.

⁸ Тана келсн үгмүдиг Би цугинь эднд келв. Тедн үгитн седкләрн орулв. Намаг Танас ирснд, Та Намаг илгәв гиснд тедн йосндан иткв.

⁹ Би эднә төлә сурҗанав. Би орчлңгин төлә биш, Тана өгсн әмтнә төлә сурҗанав. Тер юңгад гихлә, эдн Тана.

¹⁰ Нанд бәәсн юмн Тана. Танд бәәсн юмн Мини. Теднәр дамҗад Би туурв.

^11-12 Би эн орчлңгас һарад Танур йовҗанав. Зуг эдн әмтнә дунд үлдҗәнә. Әрүн Аав, эдн маднла әдл ни-негн болтха гиһәд, Эврәннь нернә күчәр Та эдниг харстн. Та эн нериг Нанд өгләт. Эднлә бәәсн цагт Тана нернә күчәр Би эдниг харсҗ йовлав. Та эн нериг Нанд өгләт. Эднәс негнь чигн геедрсн уга. Зуг негнь геедрх зөвтәнь геедрв. Тер юңгад гихлә, Бичгин үг бүтх зөвтә билә.

¹³ Ода Би Тан тал йовҗанав. Зуг һазр деер бәәсн цагт Мини ик байрар эдн дүүртхә гиҗ цугинь Би келҗәнәв.

¹⁴ Би эднд Тана үг келләв. Тер учрар орчлң эднд дурго болҗана. Юңгад гихлә, эдн Нанла әдл эн орчлңгин биш.

¹⁵ Би эдниг эн орчлңгас автн гиҗ сурҗахшв. Та эдниг хар сәкүснәс харстн гиҗ сурҗанав.

¹⁶ Эдн Нанла әдл эн орчлңгин биш.

¹⁷ Үнәр эдниг әрүтктн. Тана Үг йосн үнн.

¹⁸ Та Намаг орчлңд илгәсн метәр Би эдниг орчлңд илгәҗәнәв.

¹⁹ Эдниг Танд нерәдхәр экләд Бийән Танд нерәдҗәнәв. Эдниг үнәр Тана болтха гиһәд тиигҗәнәв.

²⁰ Би һанцхн эднә төлә сурҗахшв. Би эднә үгәр Нанд иткх әмтнә тускар бас сурҗ бәәнәв.

²¹ Тедн ни-негн бәәтхә гиҗ Би зальврҗанав. Аав, Та Нанла негдҗ, Би Танла негдҗ бәәдгәр тедн Мандла негдҗ бәәтхә. Тедн негдҗ бәәтхә! Тегәд Та Намаг илгәсиг орчлң иткх.

²² Тана өгсн туурмҗиг Би эднд өгләв. Эдн Маднла әдл ни-негн болтха гиһәд тиигләв.

²³ Тедниг негдүлхәр Би теднлә негдҗ бәәнәв, Та Нанла негдҗ бәәнәт. Эн учрас Та Намаг илгәвт гиҗ Нанд дурта болсн кевәр теднд дуран өгнәт гиҗ орчлң медх.

²⁴ Аав! Тана өгсн әмтн Нанла хамдан бәәтхә. Мини бәәсн һазрт тедн бас бәәтхә, гиҗ Танас сурҗанав. Тедн Мини туурмҗиг үзтхә. Тер туурмҗиг Та орчлң үүдәд уга бәәтл Нанд ик хәәртә болад өгләт.

²⁵ Үнн чик Аав! Орчлң Таниг медсн уга. Би Таниг меднәв. Болв Та Намаг илгәсиг эдн меднә.

²⁶ Тиигҗ Нанд өгсн Тана дурн эдниг дүүргтхә гиһәд болн Намаг теднлә негдҗ бәәтхә гиһәд, Би эднд Тана тускар секв. Болв цааранднь секәд бәәхв.