Әмтнә то авлһн 3 - Хальмг келнд орчулсн Әрүн Бичлһс

Ахарона көвүд

¹ Деед Эзиг Синай уул деер Мошелә күүндсн цагт бәәсн Ахарона болн Мошен хөөт үйнр эн.

² Ахарона көвүдин нерд: Надав – Ахарона түрүн үрн, Авиуд, Элеазар болн Итамар.

³ Эдн Ахарона көвүд, эдн гелңгин нер зүүһәд тосар түркгдсмн, гелңгин номд орулгдсмн.

⁴ Надав Авиуд хойр Деед Эзнд мөргүл кехәр харш болх һал авч ирсн бәәҗ. Синайин көдә һазрт Деед Эзнә өмн тедн үкҗ. Теднд күүкд уга бәәҗ. Элеазар Итамар хойр Ахарон эцкнь әмд бәәтл гелңгүд болҗ.

⁵ Деед Эзн Мошед келв:

⁶ – Левин отга улсиг дуудад Ахарон гелңгин һардврт орул. Тедн Ахарона сөөвң болтха.

⁷ Ахарона төлә болн цуг хамцана төлә Харһлтын Шатрин хаҗуд кергән күцәх зөвтә. Өргә герт күцәх кергиг цугтаһинь кетхә.

⁸ Цуг Израилин әмтнә төлә бас көдлмш кехләрн, тедн Харһлтын Шатрт бәәх тоотыг дааҗ хәләҗәнә, кех көдлмшиг цугтаһинь кеҗәнә.

⁹ Левитмүдиг Ахарона болн терүнә көвүдин һардврт орул. Левитмүд Израилин әмтн дундас терүнд өггдв.

¹⁰ Ахаронд болн терүнә көвүдт гелңгин көдлмш келһиг даалһ. Кемр өргә гер тал эднәс талдан кен чигн күн өөрдхлә, тер алгдх йоста.

¹¹ Деед Эзн Мошед келв:

¹² – Би левитмүдиг Израилин улсас авув. Би тедниг Бийдән Израилин әмтнә түрүн үрдин ормд авчанав. Экин геснәс һарсн түрүңк үрдин ормд авчанав. Левитмүд Мини болхмн.

¹³ Яһад гихлә ямаран чигн түрүңк үрн Мини. Египетин түрүңк үрдиг Би алсна хөөн, Бийиннь төлә Би Израилин түрүн үрдиг цугтаһинь салһад әрүслләв: әмтнә түрүн үрдиг, малын түрүн төлиг. Тедн Мини болҗана. Би Деед Эзн.

Левитмүдиг тоолҗ бичлһн

¹⁴ Синайин көдәд Деед Эзн Мошед келв:

¹⁵ – Левин хөөт үйнриг уңг-тохмарнь болн өрк-бүл болһинь бүрткҗ бичҗ ав. Левин нег сарас деегшән наста залусин тоод орх дүңгә хөөт үйнриг цугтаһинь бичҗ ав.

¹⁶ Моше Деед Эзнә зааһад келсәр тедниг бүрткҗ бичҗ авв.

¹⁷ Левин көвүдин нерд иим: Гершон, Кахат болн Мерари.

¹⁸ Гершона көвүдин нерд иим: Ливни болн Шими уңг-тохмтаһан хамдан.

¹⁹ Кахатын көвүдин нерд: Амрам, Ицхар, Хеврон болн Узиэл уңг-тохмтаһан хамдан.

²⁰ Мерарин көвүдин нерд: Махли болн Муши уңг-тохмтаһан хамдан. Левин өрк-бүлмүд болн уңг-тохмнь тиим.

²¹ Гершонас Ливнин уңг-тохм болн Шимин уңг-тохм һарчана. Эдн Гершона хөөт үйнрин уңг-тохм.

²² Теднәд 7 500 залу улс нег сарас деегшән настань бүрткҗ бичҗ авгдв.

²³ Гершона уңг-тохмин хөөт үйнр өргә герин ар бийднь – барун үзг талнь бәәрлх зөвтә.

²⁴ Гершона хөөт үйнрин һардачнь – Эльясаф Лаэлин көвүн.

²⁵ Харһлтын Шатрт Гершона хөөт үйнрин күцәх кергнь иим: тедн өргә гериг хәләх, терүнә бүркәг, Харһлтын Шатрин үүднд бәәдг көшг хәләх.

²⁶ Хашан көшг, хаша дотр бәәдг өргә гер болн тәкл тәкдг орм, дотракшан ордг үүднд бәәх көшгиг болн деесд хәләх кергтә. Тедн тенд кергтә көдлмшиг цугтаһинь кех йоста.

²⁷ Кахатас Амрамин уңг-тохм, Ицхарин уңг-тохм, Хеврона уңг-тохм болн Узиэлин уңг-тохм һарчана. Эдн Кахатын хөөт үйнрин уңг-тохм.

²⁸ Теднәд 8 600 залус нег сарас деегшән настань бүрткҗ бичҗ авгдв. Теднд әрүн тоот юмсиг хәләтхә гиҗ даалһгдв.

²⁹ Кахатын хөөт үйнрин уңг-тохмс өргә герәс өмн үзг тал бәәрлҗ бәәх йоста болҗана.

³⁰ Кахатын хөөт үйнрин һардачнь Элцафан – Узиэлин көвүн.

³¹ Тедн Бооцана хәәрцгиг, әрүн өдмг тәвдг ширәг, герлин гегәг, тәкл тәкдг ормиг болн күҗ уңһдадг ширәг, мөрглһнә цагт олзлдг әрүн тоот юмсиг болн көшгиг хәләҗ харх йоста. Тедн кергтә көдлмшиг цугтаһинь күцәхмн.

³² Левин деед һардачнь Элеазар – Ахарон гелңгин көвүн. Терүнә һардврт әрүн тоот юмсиг хәләдг әмтн орна.

³³ Мерариас Махлин уңг-тохм болн Мушин уңг-тохм һарна. Эдн Мерарин хөөт үйнрин уңг-тохм.

³⁴ Теднәд 6 200 залу улс нег сартаһас деегшән настань бүрткҗ авгдв.

³⁵ Мерарин хөөт үйнрин һардачнь Цуриэл – Авихаилин көвүн. Тедн өргә герәс ар үзг тал бәәрлх йоста.

³⁶ Мерарин хөөт үйнр өргә герин тулг бахнсиг, көндлң моддыг, бахнсиг, түшг моддыг болн цуг кергтә тоотсиг хәләҗ бәрх йоста. Тедн кергтә көдлмшиг цугтаһинь күцәхмн.

³⁷ Тедн хашан эргнд бәәх бахнсиг, түшг моддыг, бичкн һасдыг болн деесдиг бас харҗ хәләх йоста.

³⁸ Өргә герин өмн Харһлтын Шатрин дорд үзг талнь Моше, Ахарон болн терүнә көвүд бәәхмн. Тедн Израилин цуг көвүдин ормд өргә герт көдлмш кеһәд хәләхмн. Кемр өргә гер тал талын күн өөрдхлә, терүг алх кергтә.

³⁹ Деед Эзнә заасар левитмүд дунд Моше Ахарон хойрин кесн бүртклһнә бичлһнд уңг-тохмднь 22 000 залу улс нег сартаһас деегшән настань тоод орв.

Израилин түрүн үрдиг тоолад бичҗ авлһн болн тедниг хулдҗ авлһн

⁴⁰ Деед Эзн Мошед келв: – Израилин әмтнә нег сартаһаснь деегшән наста түрүңк көвүн үрдинь бичҗ ав. Теднә тооһинь бүртк.

⁴¹ Би Деед Эзн! Нанд Израилин әмтнә түрүңк үрдин ормд левитмүдиг ав. Левитмүдин малыг Израилин әмтнә малмудын түрүңк төлин ормд ав.

⁴² Моше Деед Эзнә заасар Израилин әмтнә түрүңк көвүн үрдинь бүрткҗ бичҗ авв.

⁴³ Залусин тоод орх түрүңк үрднь нег сарас деегшән настань тооһарн 22 273 күн болв.

⁴⁴ Деед Эзн Мошед келв:

⁴⁵ – Израилин әмтнә түрүңк көвүн үрдин ормд левитмүдиг ав. Левитмүдин малыг Израилин әмтнә малын ормд ав. Левитмүд Мини болх. Би Деед Эзн!

⁴⁶ Болв Израилин әмтнә түрүңк үрднь тооһарн 273 күн левитмүдәс ик болснд,

⁴⁷ тедниг мөңгәр хулдҗ ав. Күн болһна үннь тавн шекель болх, әрүн бәәрнә шекеләр. Шекель болһнд 20 гера.

⁴⁸ Тер мөңгиг Ахаронд болн көвүдтнь өг, эннь хулдҗ авсна мөңгн.

⁴⁹ Моше левитмүдәр сольгдад уга Израилин әмтнә түрүн үрдин ормд мөңгинь цуглулҗ авв.

⁵⁰ Әрүн бәәрнә шекель болхла 1 365 цаһан мөңгн шекель болв.

⁵¹ Деед Эзнә заасар Моше эн цаһан мөңгиг Ахаронд болн терүнә көвүдт өгв. Тиигтхә гиҗ терүнд Деед Эзн закв.