Эклц 49 - Хальмг келнд орчулсн Әрүн Бичлһс

Яков эврәннь 12 көвүһән әдслнә

¹ Эврәннь көвүдән дуудад, Яков иигҗ келнә: – Намаг бүсләд зогстн, би таднд иргчдән юн болхиг келҗ өгхәр бәәнәв.

² Яковин көвүд, цуглрад соңстн, эврәннь эцк Израилиг соңстн.

³ Рубен, чи мини түрүңк көвүнч, мини күчн, залу күн болсна мини түрүңк үрн, цугтаһаснь даву, чидл-күчәрн түрүңкич.

⁴ Усн мет дольгалҗ йовх чи түрүңк болҗ чадшгоч. Чи мини зарц гергнлә орндм кевтәд, нерим бузрдаввч.

⁵ Шимон Леви хойрин ни-негн: теднә селмс – күч үзүллһнә дәәнә зер-зев болҗана.

⁶ О, би теднә нуувч зурад орлцшгов, теднә хургла негдшгов, яһад гихлә, уурлхларн, тедн әмт ална, бүүрһхләрн, бухин тәкмин шүрүс керчнә.

⁷ Теднә цухл харалта, юңгад гихлә догшн болҗана. Теднә һалзурлһн харалта, юңгад гихлә хәәрлт уга болҗана. Би теднә хөөт үйнриг цуг Израилин һазрар, теднә улс дунд тараһад хайнав.

⁸ Йуда, чини ахнр-дүүнр чамаг магтх! Чини эцкин көвүд чамаг күндлх. Яһад гихлә чи эврәннь дәәсдиг дәәнд диилхич.

⁹ Йуда, көвүн минь, чи олзан идчкәд хәрҗ ирдг баахн арслңгч. Арслң мет һазрт суняһад кевтнәч, терүг көндәх зөрг кенд бәәхмби?

¹⁰ Йудаһас йос күн булашго. Олн-әмтн алван эс авч иртл, Йудан өмн эс сөгдтл, Терүнә хөөт үйнр йос һарддг мотриг оньдин бәрх.

¹¹ Уста үзмин модна иш чини һазрт йир элвгәр урһх. Тегәд терүнд өлн элҗгниг боохла, чамд һарута болшго. Нам хамгин сән темстә моддт терүг боов чигн һару һаршго. Эврәннь хувцан чаһрт уһах дүңгә ик чаһрта болхич.

¹² Чини нүдн чаһрас хар, Шүддчнь үснәс цаһан.

¹³ Завулун теңгсин эргнд бүүрлх, Тенд кермс зогсдг шуһу һазр болх. Терүнә меҗә Сидон балһснд күрх.

¹⁴ Исахар – бий деернь теңнәтә хойр даальңгин хоорнд кевтх чидлтә элҗгнлә әдл.

¹⁵ Эн орм амрхд сәәнинь үзәд, берк сәәхнинь медәд, аца үүрхд белн болад, мухла мет өндәлго тер көдлх.

¹⁶ Дан Израилин нег отг болад, Эврәннь улсин зарһ кех.

¹⁷ Дан хаалһ деер бәәдг моһа мет болх, Җим хаалһин хорта моһа болх. Мөрнә көләс зуухлань, мөртә күн гедргән унх.

¹⁸ Деед Эзн, би Тана сулдхвр күләҗәнәв!

¹⁹ Гәдиг тонулчнр дәврх. Болв тедниг тер көөһәд, дахад мөрдх.

²⁰ Ашер һазрас хот-хол элвгәр авх. Хаанд таасгдм дүңгә әмтәхн хот Ашер авч ирәд бәәх.

²¹ Наптали йир сәәхн туһлмуд үүдәдг сул гүүҗ йовх буһ мет болх.

²² Йосип эрс давшч булгин хаҗуд урһдг уста үзмин ишмүд мет өслттә болх.

²³ Терүг саадгар хадг әмтн дәврв, Терүнлә өшәтн болв, терүг хацхав.

²⁴ Болв саадган тер батар бәрнә. Яковин күчтә Бурхна күчәр терүнә һар эвтә болх. Яковин Бурхн – Хамгин Күчтә Бурхн, Израилин Һардачнь, Харсачнь болҗана.

²⁵ Эцкинчнь шүтдг Бурхн чамд дөң болх. Хамгин күчтә Бурхн деер бәәх теңгрин әдсәр, Йорал уга һазрин әдсәр чамаг әдслҗ, Чамд олн үр, олн мал өгх.

²⁶ Чини эцкин әдсллһн кезәңк уулмудын әдсллһнәс, өгәнч мөңк довудмудын әдсллһнәс өөдән чинртә. Бурхн цуг эн әдсллһән ахнр-дүүнрән толһалҗах Йосипт өгтхә.

²⁷ Бенямин ховдг чон болҗана. Олсан эн өрүһәр үмкәд иднә, Асхар олвран хувана.

²⁸ Израилин 12 отг иим. Эцкнь күн болһниг шишлң әдслхләрн, теднд тиигҗ келв.

Яковин үкл болн терүг оршалһн

²⁹ Яков көвүдтән даалһвр өгнә: – Би удл уга эврәннь өвкнр талан һарчанав. Эпрон гидг хетин теегт бәәсн хадын көндәд мини эцкнрин хаҗуд намаг оршатн.

³⁰ Эн хадын көндә Канан һазрт Мамрен хаҗуд бәәсн Махпела теегт бәәнә. Энүгәр оршадг орм кехәр Абрахам Эпронас теегтәһинь хамднь хулдҗ авла.

³¹ Тенд Абрахам, терүнә гергн Сарра, Ицхак, Ицхакин гергн Ребека оршагдцхала. Тенд би Лияг бас оршалав.

³² Тер тег, хадын көндә хетмүдәс хулдҗ авгдла.

³³ Көвүдтән тиим заавр өгснәннь дару Яков орн деерән кевтәд өңгрв. Тиигәд эврәннь өвкнр талан һарв.