Эклц 38 - Хальмг келнд орчулсн Әрүн Бичлһс

Йуда болн Тамарь

¹ Тер цагт Йуда ахнр-дүүнрәсн салад, Хира гидг нертә адуламитин хаҗуд нүүҗ одад бәәрлнә.

² Тенд терүнд Канан һазра Шуа гидг күүнә күүкн таасгдна. Йуда терүг мордулҗ авна.

³ Гергнь саата болад, көвү һарһна. Йуда терүнд Ээр гидг нер өгнә.

⁴ Йудан гергн дәкн саата болад, хойрдгч көвүн һарна. Экнь терүндән Онан гидг нер өгнә.

⁵ Дәкәд бас көвү һарһна. Терүндән Шелә нер өгнә. (Эн йовдл учрхд Йуда Кезива гидг балһснд бәәҗ.)

⁶ Йуда түрүңк Ээр нертә көвүндән Тамарь күүк авч өгнә.

⁷ Көвүнә заң-бәрцнь му билә. Деед Эзнд тернь таасгддго бәәҗ. Тегәд Деед Эзн Ээриг үкүлнә.

⁸ Йуда Онан көвүндән иигҗ келнә: – Ахиннь белвсн гергиг ав. Ахдан нерәдәд, түрүңк үрәрн терүнә хөөт үй ке.

⁹ Болв Тамаряс һарсн үрн бийиннь үрн болшгоһинь Онан медҗәлә. Тегәд Онан тер гергнлә кевтх болһндан, ахан үрн уга болтха гиһәд, асаһан һазрт асхад бәәв.

¹⁰ Иим йовдл килнцтә болҗана. Тернь Деед Эзнд таасгдсн уга. Терүнәс көлтә Деед Эзн Онаниг үкүлв.

¹¹ Йуда Тамарьт келнә: – Мини Шелә көвүн өстл, чи белвсн күн болад, эврәннь эцк-эктәһән бәәҗә. (Тиигҗ келхләрн, тер иигҗ санв: «Ахнран дахад дү көвүнь бичә үктхәл!») Тамарь эцк-экиннь герт хәрү ирнә.

¹² Кесг цаг давна. Йудан гергн, Шуан күүкн, өңгрнә. Һашута өдрмүд давхла, Йуда нәәҗ адуламит Хирата хамдан эврәннь хөд кирһлһнд Тимна гидг һазр орна.

¹³ Тамарь хадм эцкән хөд кирһлһнд йовҗахинь медәд,

¹⁴ белвснә хувцан соляд, чирәһән бүркәд, бийән далдлад Энаим балһс ордг хаалһин хаҗуд сууна. Эннь Тимна тал һардг хаалһ бәәсмн. (Тиигхләрн Шеләг өссн бийнь терүнд Тамариг авч өгчәсмн уга.)

¹⁵ Чирәнь бүркәтә болснднь, Йуда терүг цогцан хулддг күүкд күн гиҗ санв.

¹⁶ Йуда терүн тал өөрдәд келнә: – Би чамла кевтнәв. Йуда терүг эврәннь бер гиҗ медҗәсмн уга! – Кемр би чамд зөв өгхлә, чи нанд ю өгнәч? – гиҗ тернь сурна.

¹⁷ – Би чамд ямана ишк илгәнәв, – гиҗ Йуда хәрү өгнә. Болв күүкд күн келнә: – Терүг илгәтлән бәрүлх юм үлдә.

¹⁸ – Чи ю бәрүлтхә гиҗ сурҗанач? – гиҗ Йуда сурна. – Бүчт өлгәтә тамһан, һартан бәрҗәсн тайган үлдә, – гиҗ күүкд күн келнә. Йуда цуг сурсинь өгәд, терүнлә кевтнә. Тамарь саата болна.

¹⁹ Дәкәд тер хәрәд, чирәһиннь бүркәг авч хаяд, саак белвсн хувцан өмснә.

²⁰ Йуда терүнд өгх болсн ямана ишкән нәәҗ Хираһар илгәһәд, бәрүлсн юман авхар седхлә, кедү йовв чигн хәәлһсн күүкд күн олдсмн уга.

²¹ Бәәрн улсас тер сурхла: – Энаим ордг хаалһин хаҗуд суусн аля күүкд күн яһла? – Тенд тиим күн мел уга билә, – гиҗ теднь келцхәнә.

²² Нәәҗнь хәрү ирәд, Йудад иигҗ келнә: – Би терүг олҗ чадсн угав. Бәәрн улс тенд аля күүкд күн мел уга билә гицхәв.

²³ – Бәрүлсн юмс терүнд үлдтхә. Терүг хәәһәд бидн бийән әмтнд наад бәрүлхмн биш. Би терүнд ямана ишк йовулхлаг, чи терүг олҗ чадсн угач. Бәг, – гиҗ Йуда хәрү өгнә.

²⁴ Һурвн сар давсна хөөн Йудад: – Чини бер Тамарь килнц һарһҗ, ода аля кесндән саата чигн, – гиҗ келцхәв. – Терүг балһснас һарһад һалд шататн, – гиҗ Йуда заквр өгнә.

²⁵ Тамариг цааҗлхар авч йовхла, хадм эцкдән тер иигҗ келүлнә: – Эн юмна эзнәс би саатав. Эн тамһ, бүч болн тайг һурваг таньҗант гиҗ терүнәс суртн.

²⁶ Йуда таньна. – Эн күүкд күн нанас чик юм һарһла. Би Шелә көвүндән энүг авч эс өгснд болҗах йовдл энтн, – гиҗ Йуда келнә. Йуда дәкҗ энүнлә кевтсн уга.

²⁷ Тамарин үр һарһх цаг ирнә. Үрднь икр бәәҗ.

²⁸ Гергнә геснь мошклад, нилхин һар үзгдхлә, нилхд эк болҗах эмгн тер һартнь улан утц бооһад: – Эннь түрүлҗ һарв, – гиҗ келв.

²⁹ Болв нилх үрн һаран хәрү татад авчкна. Терүнә ормд хойрдгчнь һарч ирнә. – Чи яһҗ тасрҗ һарч ирвч? – гиҗ эк болҗах эмгн нилхәс сурна. Энүнд Пәрец гидг нер өгнә.

³⁰ Пәрецин дару һартан улан утцтань һарч ирнә. Терүнд Зерах гидг нер өгнә.