Эклц 3 - Хальмг келнд орчулсн Әрүн Бичлһс

Түрүн килнц

¹ Деед Эзн Бурхна үүдәсн зерлг аңгудас хамгин мектәнь моһа бәәҗ. Күүкд күүнәс тер сурна: – Нег чигн моднас темс бичә идтн гиҗ, Бурхн үнндән тиигҗ келви?

² Күүкд күн моһад иигҗ хәрү өгнә: – Бидн садын моддас темсд идҗ чадҗанавидн.

³ Болв Бурхн келв: «Садын тал дунд урһҗах модна темсд бичә идтн, бичә тедниг көндәтн, эс гихлә тадн үкҗ одхит».

⁴ – Уга, тадн төрүц үкшгот.

⁵ Болв терүг амссн өдрәс авн нүднтн секгдәд, цаһан сана болн хар сана медәд, Бурхнла әдл болҗ одхиг Бурхн медҗәнә, – гиҗ моһа келнә.

⁶ Модна темсн хотд сән болхинь, зүсәрн авта бәәдлтәһинь күүкд күн үзәд, цецн уха өгдгинь санна. Тегәд нег темс авад иднә. Залудан нег темс өгнә, тернь темсиг бас иднә.

⁷ Тер хойрт серл орад, нүцкн бәәсән меднә, тегәд бийдән белкүсәрн боодг боодһа инҗрин хамтхасар кеҗ авцхана.

⁸ Өдрин серүн цагла сад дотраһур Деед Эзн Бурхна йовсн ә тедн соңсна. Залу гергн хойр Деед Эзн Бурхнас садын модд дунд бултна.

⁹ Болв Деед Эзн күүг дуудна: – Чи альд бәәнәч?

¹⁰ – Сад дотр Тана ду соңсад әәвүв, юңгад гихлә би нүцкмб. Тегәд би бултув, – гиҗ күн хәрү өгнә.

¹¹ – Чамаг нүцкн гиҗ кен чамд келв? Мини бичә ид гиҗ заксн моднас темс чи идсн болвзач? – гиҗ Деед Эзн Бурхн сурв.

¹² – Нанла бәәтхә гиһәд Тана өгсн күүкд күн нанд тер модна темс өгв, би терүг идүв, – гиҗ күн хәрү өгнә.

¹³ Тиигхләнь Деед Эзн Бурхн күүкд күүнд иигҗ келв: – Ю кеснчнь энви? – Моһа намаг меклв, тегәд би идүв, – гиҗ күүкд күн хәрү өгнә.

¹⁴ Тиигхләнь Деед Эзн Бурхн моһад келнә: – Чи иим йовдл һарһснас көлтә Цуг малмуд дундас, Талдан зерлг аңгуд дундас харалла харһҗанач. Чи элкәрн мөлкхич, Җирһлиннь цуг өдрмүдт Чи тоос идхич.

¹⁵ Чини болн күүкд күүнә хоорнд, Чини хөөт үйнрин болн терүнә Хөөт үйнрин хоорнд Би өшә орулнав. Терүнә хөөт үйнр чамаг толһаһарчн шаах, Чи тедниг өскәһәрнь хатххич.

¹⁶ Күүкд күүнд Деед Эзн Бурхн келв: – Чини саата цагин зовлңгиг Би икдүлхүв: үрдән чи энлҗәһәд һарһхич. Чи залутаһан ниилхәр седхич, болв тер чамд нойрхх.

¹⁷ Адамд Тер келв: – Чи гергнәннь үг соңсад, бичә ид гиҗ чамд Би заксн бийнь, тер модна темс идснәс көлтә һазр харалла харһҗана: җирһлиннь цуг өдрмүдт күчр көдлмш кеһәд, чи һазрас эдлврән авхич.

¹⁸ Һазр чамд хатханчг болн буг өвс урһах, Чи һазрас урһсн юмар эдлвр кехич.

¹⁹ Һазрт хәрү ортлан, Чи эврәннь көлсән асхҗ өдмгән олхич, Юңгад гихлә чи һазрас авгдлач. Юңгад гихлә чи – тоосн болҗанач, Чи тооснд хәрү хүврхич.

²⁰ Адам эврәннь гергндән Ева гидг нер өгв. Яһад гихлә тер цуг әмд бәәсн әмтнә элнцг экнь болв.

²¹ Деед Эзн Бурхн арсар хувц кеһәд, терүгәр Адамиг болн терүнә гергиг хувцлв.

²² Хөөннь Деед Эзн Бурхн келнә: – Күн ода цаһан сана болн хар сана медсәрн Мадна негнләнь әдл болв. Җирһлин моднас күн темс бичә таслҗ идтхә, мөңк бичә җирһтхә гиҗ саглв.

²³ Һазрас авгдсн күн һазр деер көдлтхә гиһәд, Деед Эзн Бурхн терүг Эденә садас көөв.

²⁴ Күүг көөчкәд, Бурхн Эденә садын дорд үзгт җирһлин модн талк хаалһ манхин төлә керүбмүдиг зогсав, эргдг һал үлд тәвв.