Эклц 25 - Хальмг келнд орчулсн Әрүн Бичлһс

Абрахамин үкл

¹ Абрахам талдан герг бийдән авна. Терүнә нерн Хетура.

² Тер Абрахамд Зимраниг, Йокшаниг, Меданыг, Мидьяниг, Ишбакиг болн Шуахиг һарһҗ өгнә.

³ Шебән Дедана хойрин эцк Йокшан бәәҗ. Дедана хөөт үйнр ашурнр, летушнр болн леюмнр бәәҗ.

⁴ Эфа, Эфер, Ханок, Авида болн Элда Мидьяна көвүд. Тедн цугтан Хетуран хөөт үйнр.

⁵ Абрахам бийдән бәәсән цугтаһинь Ицхакд үлдәнә.

⁶ Әмд бәәхдән Абрахам хөөт гергдиннь көвүдт белг өгәд, Ицхак көвүнәсн хольҗулад, дорд үзгин һазрур йовулҗ.

⁷ Абрахам ут турштан 175 нас наслна.

⁸ Түүнә наснь күцәд, икәр көгшрәд, тер сүл әмсхлән һарһад өңгрнә. Эврәннь өвкнр тал тер һарна.

^9-10 Терүнә Ицхак Ишмаил хойр көвүнь эцкән Махпела гидг хадын көндәд оршана. Тернь Абрахамин хетмүдәс хулдҗ авсн Мамренәс дорд үзг тал бәәсн Цохарин көвүнә Эпрона тәрәнә һазр билә. Тенд Абрахам Сарра гергнәннь хаҗуд оршагдв.

¹¹ Абрахамиг өңгрснә хөөн Бурхн тиигхд Беэр-лахай-ройин хаҗуд бәәсн терүнә көвүн Ицхакд әдс өгнә.

Ишмаилин көвүд

¹² Сарран зарц Египет һазра күүкд күн Хагар Абрахамд һарһҗ өгсн Абрахамин Ишмаил көвүнә тохм уңг эн.

¹³ Ишмаилин көвүдин нерд төрсн диг-дараһарн эн: Невайот – Ишмаилин түрүңк көвүн, Кедар, Адбеел, Мивсам,

¹⁴ Мишма, Дума, Масса,

¹⁵ Хадад, Тема, Етур, Нафиш болн Кедма.

¹⁶ Эннь Ишмаилин көвүд – 12 нойн. Цаг зуур бүүрлсн болн бәәрн һазра отгуд теднә нерд зүүнә.

¹⁷ Ишмаил 137 җилд әмд бәәв. Сүл әмсхл һарһад өңгрв, эврәннь өвкнр тал һарв.

¹⁸ Терүнә хөөт үйнр Ашур ордг хаалһар Египетин меҗән хаҗуд Хавилас Шур күртл бәәх һазрт бүүрлцхәв. Тедн эврәннь ахнр-дүүнртәһән өшәркҗ бәәцхәв.

Яков Эсав хойр

¹⁹ Абрахамин көвүн Ицхакин уңг-тохмин туск келвр эн: Ицхак Абрахамин көвүн.

²⁰ Паддан-Арамас Лавана дү күүкн болн арамей Бетүелин күүкн Ребекаг буулһҗ авхд Ицхак дөчтә билә.

²¹ Ицхак Деед Эзиг гергнәннь төлә эрҗ сурна, яһад гихлә терүнд үрн олддго билә. Деед Эзн терүнә зальврлһиг соңсна – терүнә гергн саата болна.

²² Геснд бәәх үрднь нег-негән тиирәд бәәхлә, Ребека келнә: – Нанла яһад иим юмн учрҗахмб? Деед Эзнәс сурхар тер йовна.

²³ Деед Эзн иигҗ келнә: – Чини геснд хойр отг бәәнә, Чамас хойр келн-улс үүдәд салх; Негнь негнәсн күчтә болх, Ахнь дүүдән заргдх.

²⁴ Күүкд һарһх цаг ирхлә, гергнә геснд икр көвүд бәәдг болна.

²⁵ Түрүңкнь улан махмудта һарна. Нооста махмуднь кевтән килң хувцар бүркәтә мет болна. Тегәд терүнд Эсав гидг нер өгнә.

²⁶ Дарунь Эсавин дүнь терүнә тавгаснь бәрсн һарна. Тегәд дүүднь Яков гидг нер өгнә. Ребекаг тедниг һарһхд Ицхак җиртә бәәҗ.

²⁷ Көвүд өснә. Эсав мергн аңһуч, кеерин күн болна. Яков болхла тогтун, герән эргәд бәәдг күн болв.

²⁸ Ицхак зерлг аңгуд идхдән дурта болад, Эсавд икәр дурлдмн. Ребека болхла Яковд икәр дурта бәәҗ.

²⁹ Нег дәкҗ Яковиг буда чанҗахла, Эсав муурад, өлсәд кеерәс орҗ ирнә.

³⁰ – Шулуһар тер улан юмнасн нанд ас! Би харһнад үкҗәнәв! – гиҗ Яковд тер келнә. (Эн учрар терүнд Эдом гидг нер бас өглә.)

³¹ – Түрүләд нанд түрүлҗ төрснә зөвән хулд, – гиҗ Яков хәрү өгнә.

³² – Нә сән! Би үкҗәнәв. Түрүңк болҗ һарснас нанд ямаран олз болҗана? – гиҗ Эсав келнә.

³³ – Түрүләд андһар өг, – гиҗ Яков келнә. Эсав андһар өгнә. Тегәд тер түрүн болҗ һарсан Яковд хулдна.

³⁴ Терүнә хөөн Яков Эсавд өдмг болн бурцгар кесн буда өгнә. Тернь идәд, ууһад, босад йовҗ одна. Тиигҗ Эсав түрүн болҗ һарсн зөвдән оньган өгсн уга.