Эклц 23 - Хальмг келнд орчулсн Әрүн Бичлһс

Сарран үкл

¹ Сарра 127 җилдән әмд йовв.

² Керьят-Арбад (эс гихлә Хевронд) Канан гидг һазрт тер өңгрв. Абрахам Саррад уйдҗ уульхар ирнә.

³ Дәкәд Абрахам гергнәннь цогцас хооран һарад, хетмүдлә күүнднә. Тер иигҗ келнә:

⁴ – Би тадн дунд күүнә күмб, нүүҗ ирсн күмб. Тадн нанд үкәрин һазр хулдтн. Тенд би өңгрсн гергән оршанав.

⁵ Хетмүд Абрахамд иим хәрү өгнә:

⁶ – Тана зергәс, соңстн. Та мадн дунд күчтә нойн болҗанат. Эврәннь гергән өңгрсн цогц хадһлдг мана хамгин сән һазрт оршатн. Маднас кен чигн күн Танд өңгрсн күүһән оршахд тиим һазр өгшгов гиҗ келшго.

⁷ Тиигхләнь Абрахам босад, тер һазра хетмүдт ханлтан өргв.

^8-9 – Кемр тадн, намаг гергән энд оршахд буру эс гиҗәхлә, тиигхлә, буйн болтха, мини төлә Цохарин көвүн Эпронас нанд Махпела гидг хадын көндә хулдтха гиҗ суртн. Эн хадын көндә терүнә тәрәнә захд бәәнә. Эпрон йосн үнәрнь тер бәәриг нанд тадна нүүрт хулдтха. Тегәд тер бәәрн оршагдлһна һазр болх.

¹⁰ Хет Эпрон эврәннь улс дунд сууҗ. Терүнә балһсна үүдн тал ирсн цуг хетмүдин нүүрт тер Абрахамд иим хәрү өгнә:

¹¹ – Уга, мини нойн, буйн болтха, намаг соңстн. Би танд тәрәнә һазр, терүн деер бәәх хадын көндә өгчәнәв. Би энүг танд мини улсин нүүрт өгчәнәв. Эврәннь гергән оршатн.

¹² Абрахам шинәс тер һазра әмтнд ханлтан өргәд гекв.

¹³ Цуг хетмүд соңсдгар Эпронд иигҗ тер келнә: – Буйн болтха, чи бас намаг соңс. Би тәрәнә һазрин үнинь өгнәв. Би өңгрсн гергән оршаҗ чаддгар тер мөңгинь нанас ав.

¹⁴ Эпрон Абрахамд келнә:

¹⁵ – Соңстн намаг, мини нойн: һазрин үннь 400 цаһан мөңгн болҗана. Эннь нанд, танд юмб? Оршатн өңгрсн күүһән.

¹⁶ Абрахам Эпрона келснлә зөвшәрәд, терүнд хетмүдин чирәд заасн һазрин үнинь цаһан мөңгәр чиңнүрдәд өгнә. Тернь кувцнрин кемҗәһәр 400 цаһан мөңгн болна.

¹⁷ Тегәд Мамрен хаҗудк Махпелад бәәсн Эпрона һазр – тәрәнә һазр, терүн деерк хадын көндә, тәрәнә һазрин эргнд урһҗах цуг модд –

¹⁸ балһсна үүдн тал ирсн хетмүдин нүүрт Абрахамин зөөр болв.

¹⁹ Терүнә хөөн Абрахам Сарраһан Мамрен (эс гиҗ Хеврона) хаҗудк Махпелад бәәсн хадын көндәд – Кананд оршав.

²⁰ Тәрәнә һазр, терүн деер бәәсн хадын көндә оршалһна һазр болҗ Абрахамд хетмүдәс күртв.