Эклц 22 - Хальмг келнд орчулсн Әрүн Бичлһс

Абрахамиг сөрлһн

¹ Цаг давад, Бурхн Абрахамиг сөрҗ хәләнә. – Абрахам! – гиҗ Тер келнә. – Би энд бәәнәв, – гиҗ Абрахам хәрү өгнә.

² – Ор һанцхн дурта Ицхак көвүһән авад, Мориа гидг һазр тал йов. Тенд уул деер көвүһәрн шаталһна тәкл тәк. Альк уулд кехинь Би чамд келҗ өгнәв, – гиҗ Бурхн келнә.

³ Маңһдуртнь өрүн өрлә Абрахам босад, элҗгнән тохҗ авад, хойр зарцан болн Ицхак көвүһән дахулад, шатах мод хамхлҗ авад, Бурхна заасн һазр тал һарад йовна.

⁴ Һурвдгч өдртән Абрахам холас тер һазриг үзнә.

⁵ – Тадн элҗгнтәһән энд үлдтн, бидн көвүтәһән тиигәрән одад, мөргәд, дәкәд тадн тал хәрү ирнәвидн, – гиҗ Абрахам зарцнртан келнә.

⁶ Абрахам шатах модан авад, Ицхакин нурһн деер тәвәд үүрүлнә, эврән һал, утх авна. Хоюрн тегәд йовна.

⁷ Ицхак эврәннь эцк Абрахамд келнә: – Эцк! – Э, э, көвүм минь, – гиҗ Абрахам хәрү өгнә. – Маднд һал болн модн бәәнә, зуг тәкл тәкх хурһн альд бәәхмб? – гиҗ Ицхак сурв.

⁸ – Көвүн минь, Бурхн Эврән шаталһна тәкл тәкх хурһиг хәләх, – гиҗ Абрахам хәрү өгнә. Цаарандан эдн хоюрн йовад йовв.

⁹ Бурхна заасн һазрт тедн күрхләрн, Абрахам тәкл тәкх бәәр белднә, терүн деер модан тәвәд, деернь эврәннь Ицхак көвүһән күләд кевтүлнә.

¹⁰ Абрахам көвүһән алхар һартан утх авна.

¹¹ Болв теңгрәс Бурхна элч терүг дуудна: – Абрахам! Абрахам! – Би энд бәәнәв, – гиҗ тер хәрү өгнә.

¹² – Көвүн тал бичә һаран өрг, бичә терүг көндә. Ода чи Бурхиг икәр күндлхиг Би медҗәнәв. Яһад гихлә чи Мини төлә ор һанцхн көвүһән хармнсн угач, – гиҗ Бурхна элч келнә.

¹³ Деегшән хәләхләрн, Абрахам нигт бура модн дотр өврәрн оралдсн хуц үзнә. Тер хуциг татҗ авад көвүнәннь ормд шатаһад, тәкл тәкнә.

¹⁴ Тер ормиг Абрахам «Деед Эзн хәләх» гиҗ нерәднә. Тегәд ода күртл «Деед Эзн уул деерән хәләх» гиҗ келцхәнә.

¹⁵ Деед Эзнә элч теңгрәс хойрдад Абрахамиг дуудад иигҗ келнә:

¹⁶ – Деед Эзн Бийәрн андһар өгчәнәв гиҗ келҗәнә. Чи иим юм һарһад, Мини төлә ор һанцхн көвүһән хармнсн угач,

¹⁷ тегәд, Би маһд уга чамаг әдслнәв, Чини хөөт үйнриг тооһарнь икдүлнәв: Тедн теңгртк одд мет, теңгсин көвән элсн мет олн болх. Чини хөөт үйнр дәәсдиннь балһсд эзлҗ авх.

¹⁸ Чи Намаг соңсснас иштә, Чини хөөт үйнрәр дамҗад, һазр деерк цуг улс әдслгдх.

¹⁹ Абрахам зарцнр талан хәрү ирв. Тегәд тедн хамдан Беэр-Шева тал йовцхав. Абрахам Беэр-Шевад бәәлә.

Нахорин көвүд

²⁰ Цаг давна. Милка бас эк болв, чини ах Нахорт көвүд һарһҗ өгв, гиҗ Абрахам соңсна.

²¹ Түрүңкнь Уц гидг нертә, терүнә дү Буз, Кемүэл (Арамин эцк),

²² Кесед, Хазо, Пилдаш, Идлап болн Бетүэл.

²³ Ребекан эцк Бетүэл болв. Эн 8 көвүг Милка Абрахамин ах Нахорт һарһҗ өгв.

²⁴ Реума гидг нертә терүнә хөөт гергн бас көвүд һарһна. Теднә нерд: Тевах, Гахам, Тахаш болн Мааха.