Эклц 18 - Хальмг келнд орчулсн Әрүн Бичлһс

Һурвн гиич

¹ Өдрәр һал үдлә Мамрен хар моддын хаҗуд шатриннь үүднд суухлань, Абрахам тал Деед Эзн баралҗ ирнә.

² Хәләхлә, хол биш зогсчасн һурвн күн Абрахамд үзгднә. Тедниг үзн, Абрахам шатрин үүдн талас өмнәснь тосч гүүһәд, һазрт күрч мөргв.

³ – Мини Деед Эзн, кемр би Тана нүүрт хәәрлт үзсн болхла, Эврәннь зарцин хаҗуһар бичә давҗ һартн.

⁴ Эн модн дор амрад суутн, көлитн уһах ус ода авч ирх,

⁵ би таднд хот авч ирнәв. Кемр тадн эврәннь зарцин хаҗуһар йовҗ йовсн болхла, невчкн чидл авад, цаарандан йовхит, – гиҗ тер келв. – Йир сән. Келсәрн ке, – гиҗ тедн келв.

⁶ Абрахам шатр дотр бәәсн Сарра тал адһна. – Шулуһар икәр сән һуйр авад, элдәд өдмг болһ, – гиҗ Абрахам гергндән келнә.

⁷ Дәкәд тер мал талан гүүҗ одад, сәәнәснь баахн туһл бәрҗ авад, зарцдан өгнә. Тернь хот белднә.

⁸ Дәкәд Абрахам ээзгә, үс авч ирнә, гиичнрин өмн болһсн туһлын мах тәвнә. Тедниг хот идтл, Абрахам хаҗуднь модна сүүдрт зогсв.

⁹ – Сарра гидг гергнчнь яһла? – гиҗ тедн Абрахамас сурна. – Тенд, шатр дотр бәәнә, – гиҗ тер хәрү өгнә.

¹⁰ Тиигхләнь нег гиич келнә: – Би маһд уга урһх җилд хәрү чам тал ирнәв, минь эн цагла. Чини гергн Сарра көвүтә болх. Арднь бәәсн шатрин үүднд зогсчасн Сарра теднә күүндвр соңсна.

¹¹ Абрахам Сарра хойр көгшн, ик наста билә. Күүкд улст ирдг сарин кир Саррад ирдгән уурла.

¹² Тегәд Сарра инәһәд, дотран иигҗ санна: – Би көгшрүв, мини эзн көгшн: нанд тиим байр үзгдхмн болхви?

¹³ Тиигхләнь Деед Эзн Абрахамд келнә: – Яһад Сарра инәҗәхмб? «Йосндан нанд күүкд олдхмн болхви, би көгшнлм», – гиҗ яһад келв?

¹⁴ Деед Эзнд күцәҗ болшго кецү юмн бәәхий? Би тадн тал җил болад ирнәв, Сарра көвүтә болх.

¹⁵ – Би инәсн угав, – гиҗ Сарра әәһәд, худл келнә. – Уга, чи инәләч, – гиҗ Деед Эзн келнә.

Абрахам Содомин тускар сурна

¹⁶ Залус босад, Содом тал хәләцхәв. Абрахам тедниг үдшәхәр хамдан һарна.

¹⁷ – Кехәр седҗәхән Би Абрахамас нуухий?

¹⁸ Абрахамас маһд уга алдр болн чидлтә улс үүдх. Һазр деерк келн-улс цугтан терүгәр дамҗад әдс авх.

¹⁹ Би терүг шүүҗ авхларн, тер эврәннь үрдтән, цуг хөөт үйнртән Деед Эзнә хаалһар йовтха гиҗ заквр өгтхә гиләв: үнн болн чик бәәдлтәһәр бәәтхә. Би, Деед Эзн, Абрахамд өгх болсан күцәхүв, – гиҗ Деед Эзн келв.

²⁰ – Содом болн Гоморан балһсдт бәәх улс йир андн, теднә килнц дегд ик, гиҗ Би соңслав.

²¹ Би бууһад хәләнәв, Мини соңссар болхий аль угай? Кемр уга болхла, Би медхв, – гиҗ Деед Эзн Абрахамд келв.

²² Залус эргәд, Содом тал йовна, болв Абрахам Деед Эзнә өмн зогсад үлдв.

²³ Абрахам Терүн тал өөрдәд иигҗ келнә: – Та үннч күүг килнцтә күүнлә хамднь уга кеһәд оркхийт?

²⁴ Кемр тер балһснд тәвн үннч күн бәәхлә яахмб? Эн ормиг Та үннч тәвн күүнә төлә хармнлго, уга кехийт?

²⁵ Бичә үзгдтхә. Тиим юм Та һарһшгот. Үннч күүг килнцтә күүнлә хамднь алшгот, үннч күүг килнцтә күүнлә әдл засглҗ чадшгот. Та тиигҗ чадшгот! Цуг һазрин Зарһч үнн биш юм һарһхий?

²⁶ – Кемр Содомд Би үннч тәвн кү олҗ авхла, теднә төлә эн балһсиг хәәрлнәв, – гиҗ Деед Эзн келв.

²⁷ Тиигхлә Абрахам шинәс иигҗ келв: – Ода би күр, тоосн болх болв чигн Деед Эзнд зөрцҗ иигҗ келхәр седҗәнәв:

²⁸ Кемр үннч тәвн күүнд тавнь эс күртхлә яахмб? Тавн күүнәс көлтә Та цуг балһсиг уга кехийт? – Кемр Би тенд дөчн тавн кү олхла, тиигхлә терүг Би уга кешгов, – гиҗ Деед Эзн келв.

²⁹ Абрахам терүнәс бас нег дәкҗ: – Тенд зуг дөчхн күн олдхла яахмб? – гиҗ сурна. – Дөчн күн бәәхлә, Би тиим юм кешгов, – гиҗ Деед Эзн келв.

³⁰ Тиигхлә Абрахам келв: – Деед Эзн бичә уурлтха, нанд келх зөв өгтхә. Кемр зуг һучн күн олдхла яахмб? – Кемр тенд һучн кү олҗ авхла, Би тиим юм кешгов, – гиҗ Деед Эзн хәрү өгв.

³¹ Абрахам иигҗ келв: – Деед Эзнәс иигҗ сурхар би шиидүв. Тенд зуг хөрн күн олдхла яахмб? – Хөрн күүнә төлә, Би терүг уга кешгов, – гиҗ Деед Эзн хәрү өгв.

³² Тиигхлә Абрахам келв: – Деед Эзн бичә уурлтха, зуг нанд бас келх зөв өгтхә. Кемр арвхн күн олдхла яахмб? – Арвн күүнә төлә Би терүг уга кешгов, – гиҗ Деед Эзн келв.

³³ Абрахамла кесн күүндврән төгсәһәд, Деед Эзн йовв, Абрахам герүрн хәрҗ ирв.