Эклц 17 - Хальмг келнд орчулсн Әрүн Бичлһс

Керчлһнә бооцан

¹ Абрамиг йирн йистәднь Деед Эзн терүн тал баралҗ ирәд келнә: – Би Хамгин Күчтә Бурхнв, Мини эв-арһар бә, нерән бичә һута.

² Би чамла бооца кенәв, чамд йир олн тоота хөөт үйнр өгнәв.

³ Абрам Бурхна өмн түргүр унна. Бурхн терүнд келнә:

⁴ – Чамла кеҗәх Мини бооцан эн: чи олн келн-улсин эцк болхич.

⁵ Чамаг дәкҗ Абрам гиҗ келшго, чини нерн Абрахам болх. Чамар Би олн келн-улсин эцк кенәв.

⁶ Би чамаг йир өслттә кү кенәв. Чамас келн-улс үүдҗ төрдгәр кенәв. Чини хөөт үйнр хан болцхах!

⁷ Би чамла бооца кенәв. Мини болн чини хоорнд, чини иргч үйнрин хоорнд мөңк бооца кенәв. Би чини Бурхн болнав, чини хөөт үйнрт Бурхн болнав.

⁸ Чи оруд күн болҗ бәәх Канана һазриг чамд болн чини хөөт үйнрт мөңк эзллһнд өгнәв, теднә Бурхн болхв.

⁹ Бурхн Абрахамд иигҗ келв: – Чи болхла, Мини бооца күцәх йостач. Чи болн чини хөөн хөөт үйнрчнь терүг күцәх йоста.

¹⁰ Чамла болн чини хөөн хөөт үйнртәчнь кесн, чини күцәх Мини бооцан эн: таднас эр күн болһн керчүлгдтхә.

¹¹ Залу күн болһн бий махмудын үзүринь керчүлх йоста болҗана. Эннь Мини болн тадна хоорнд кесн бооцана темдг болх.

¹² Төрәд 8 өдр күцсн эр күн танад керчүлгдх йоста. Үйәс үйд тиим болтха. Чини хөөт үйнр, цуг зарцнр: чини герт төрснь чигн, хәр күүнәс мөңгәр хулдҗ авгдснь чигн керчүлгдх йоста.

¹³ Цугтан керчүлгдх йоста. Тегәд Мини мөңк бооцан тадна махмудт бооцана темдг болх.

¹⁴ Керчүлгдәд уга эр күн болхла, эврәннь келн-улсасн уга болх зөвтә. Яһад гихлә тер Мини бооцаг эвдсн күн болх.

¹⁵ Бурхн дәкәд Абрахамд иигҗ келнә: – Чини гергн Саран тускар болхла, терүг дәкҗ Сара гиҗ келшгоч, терүнә нернь Сарра болх.

¹⁶ Терүг Би әдслнәв, чамд Сарраһас көвү өгнәв. Сарраг келн-улсин эк болдгар Би әдслнәв, терүнәс олн келн-улсин эзн хад үүдҗ төрцхәх.

¹⁷ Абрахам түргүр унна. «Зун наста күүнәс көвүн һархий? Йирн наста Сарра көвү һарһхий?» – гиҗ инәһәд санна.

¹⁸ – Зуг Ишмаил әмд бәәһәд, Тана әдс авв чигн болх, – гиҗ тер Бурхнд келнә.

¹⁹ – Чини гергн Сарра чамд көвү һарһх. Терүнд чи Ицхак гидг нер өгхич. Би Ицхакла болн терүнә хөөт үрдтә Эврәннь мөңк бооцаһан кенәв.

²⁰ Ишмаилин туск чини сурвр Би соңсув. Терүг Би бас әдслнәв. Терүг Би өнр-өсклңтә болһнав, тооһарн олн болдгар бас икдүлнәв. Арвн хойр нойна эцк тер болх. Би терүнәс алдр улс үүдәҗ һарһнав.

²¹ Болв Эврәннь бооцаһан Би Ицхакта кенәв. Дарук җилд эн цагла Сарра чамд тер көвү һарһҗ өгх, – гиҗ Бурхн келв.

²² Абрахамла күүндврән чиләһәд, Бурхн йовҗ одна.

²³ Минь тер өдр Абрахам Ишмаил гидг көвүһән болн цуг эврә гертнь төрҗ һарсн әмтиг, мөңгәр хулдҗ авгдсн цуг залу улсиг цуглулад, Бурхна келсәр керчүлв.

²⁴ Тиим керчлһ бийдән келгүлхләрн, Абрахам 99 наста бәәҗ,

²⁵ Ишмаил көвүнь арвн һурвта бәәҗ.

²⁶ Абрахам болн терүнә Ишмаил көвүн тер өдртән хоюрн керчүлгднә.

²⁷ Абрахамин герт бәәсн цуг залу улс, тедн дунд терүнә герт төрҗ һарсн, һазадын орнас хулдҗ авгдсн әмтн Абрахамла хамдан керчүлгдсн болдг.