Эклц 15 - Хальмг келнд орчулсн Әрүн Бичлһс

Абрамла кесн Бурхна бооцан

¹ Энүнә хөөн Абрамд үзгдл болҗ Деед Эзн келнә: – Бичә ә, Абрам, Би чини халхцв. Чини ачлвр йир ик болх.

² Болв Абрам иигҗ келнә: – О, Деед Эзн Бурхн, кемр би үрн уга үлдҗәхлә, мини өлг-эдиг Элиезер гидг Дамаскин күн авх болхла, Та нанд ю өгч чадхвт?

³ Та нанд хөөт үй өгсн угат, мини эдл-ахуг һардҗах ялч мини өнч авх күн болх.

⁴ Деед Эзнә үг терүнд хәрүнь болв: – Терчнь чини өнч авх күн болшго, чамас һарсн күн чини өнч авх күн болх.

⁵ Деед Эзн Абрамиг һазаран дахулҗ һарад иигҗ келнә: – Теңгрүр хәләлч: кемр одд тоолҗ чадх болхла, тедниг тоол. Чини хөөт үйин улс тооһарн тиим болх.

⁶ Абрам Деед Эзнд иткнә. Итксн төләднь Деед Эзн Абрамиг чик седклтә күн гиҗ тоолна.

⁷ Деед Эзн терүнд бас иигҗ келнә: – Чамаг эзн болтха гиһәд, эн һазр өгхәр Би халдеймүдин Ур гидг балһснас чамаг дахулҗ һарһсн Деед Эзмб.

⁸ Болв Абрам сурна: – О, Деед Эзн Бурхн, энүнд эзн болхан би яһҗ медхмб?

⁹ Деед Эзн терүнд келнә: – Чи нанд һунта туһл, һунта яма болн һунта хуц, көглҗрһ болн баахн көглҗрһ авад ир.

¹⁰ Заасн зүсн-зүүл малыг, шовудыг Абрам авч ирәд, чавчад, тедниг хойр әңгләд, нег-негнәннь тус оркна, зуг шовудыг чавчсн уга.

¹¹ Махсг зерлг шовуд махн тал нислдәд бәәв, болв Абрам тедниг көөнә.

¹² Нарн суух кемлә, Абрам нөөртән икәр авлгдна: эн цагла терүн деер әәмшгтә таг харңһу бууна.

¹³ Деед Эзн терүнд келнә: – Чини хөөт үйнр күүнә һазрт оруд улс болх, тенд мухла болх, чини хөөт үйнр 400 җилдән даҗргдхиг медҗ ав.

¹⁴ Тедниг мухлалсн улсиг Би зарһла харһулхв, энүнә хөөн тедн тендәс ик өлг-эдтә һарх.

¹⁵ Чини тускар болхла – әвр көгшн насндан оршагдад өвкнртән күрхич.

¹⁶ Чини хөөт үйнр болхла – дөрвдгч үйдән нааран хәрү ирх. Яһад гихлә амореймүдин килнц кевтән күцгдәд уга.

¹⁷ Нарн сууһад харңһу болхла, утан һарчах хәәсн болн ассн заль генткн һарч ирәд, чавчад хойр әңглсн махна хоорндаһур һарна.

¹⁸ Тер өдр Деед Эзн Абрамла бооца кеһәд келнә: – Чини хөөт үйнрт Би эн һазр өгчәнәв – Египетин һолас Епрат гидг нертә алдр Һол күртл:

¹⁹ кенеймүдин, кенезмүдин, кадмонмудын,

²⁰ хетмүдин, перизмүдин, рефаимүдин,

²¹ амореймүдин, кананахна, гергашмудын болн евүсмүдин һазрмуд чамд өгчәнәв.